ഹ്യുണ്ടായി മോട്ടോർ ഇന്ത്യ പുതിയ അൽകാസർ എസ്‌യുവി ഇന്ത്യൻ വിപണിയിൽ അവതരിപ്പിച്ചു. പുതിയ രൂപഭംഗിയും സവിശേഷതകളും ഉൾക്കൊള്ളിച്ച് ആകർഷകമായ വിലയിലാണ് ഈ വാഹനം എത്തുന്നത്. പെട്രോൾ-മാനുവൽ 7-സീറ്റർ ബേസ് വേരിയന്റിന് 14.99 ലക്ഷം രൂപ മുതലാണ് എക്സ്ഷോറൂം വില. ഡീസൽ എൻട്രി ലെവൽ എക്സിക്യൂട്ടീവ് ട്രിമ്മിന് 15.99 ലക്ഷം രൂപയും വിലയുണ്ട്. മഹീന്ദ്ര സ്കോർപിയോ-എൻ, ടാറ്റ സഫാരി, എംജി ഹെക്ടർ പ്ലസ് എന്നിവയാണ് അൽകാസറിന്റെ പ്രധാന എതിരാളികൾ.
അൽകാസർ എക്സിക്യൂട്ടീവ്, പ്രസ്റ്റീജ്, പ്ലാറ്റിനം, സിഗ്നേച്ചർ എന്നീ നാല് വേരിയൻ്റുകളിൽ ലഭ്യമാണ്. ഒമ്പത് വ്യത്യസ്ത നിറങ്ങളിൽ വാഹനം എത്തുന്നുണ്ട്. പുതിയ ഡാർക്ക് ക്രോം ഗ്രില്ലും ക്വാഡ്-ബീം എൽഇഡി ഹെഡ്‌ലാമ്പുകളും H-ആകൃതിയിലുള്ള LED DRLഉം വാഹനത്തിന്റെ മുൻഭാഗത്തെ ആകർഷകമാക്കുന്നു. ക്യാബിൻ ഡ്യുവൽ-ടോൺ കളർ തീമിലാണ് അവതരിപ്പിച്ചിരിക്കുന്നത്. 10.25 ഇഞ്ച് ഇൻഫോടെയ്ൻമെൻ്റും 10.25 ഇഞ്ച് ഇൻസ്ട്രുമെൻ്റ് ക്ലസ്റ്റർ സ്‌ക്രീനുകളും സംയോജിപ്പിച്ചിരിക്കുന്നു.
അൽകാസറിൽ 8-സ്പീക്കർ ബോസ് പ്രീമിയം സൗണ്ട് സിസ്റ്റം, വയർലെസ് ചാർജർ, പനോരമിക് സൺറൂഫ്, മൾട്ടി-ലാംഗ്വേജ് യുഐ പിന്തുണ എന്നിവയും ഉൾപ്പെടുത്തിയിട്ടുണ്ട്. എൻഎഫ്‌സി സാങ്കേതികവിദ്യയുള്ള ഡിജിറ്റൽ കീ സംവിധാനവും ഇതിൽ ഉൾപ്പെടുന്നു. സുരക്ഷയ്ക്കായി ആറ് എയർബാഗുകൾ, ഹിൽ-സ്റ്റാർട്ട് അസിസ്റ്റ് കൺട്രോൾ, ഇലക്ട്രോണിക് സ്റ്റെബിലിറ്റി കൺട്രോൾ തുടങ്ങി 70-ലധികം സുരക്ഷാ സവിശേഷതകൾ അൽകാസറിൽ ഉൾപ്പെടുത്തിയിട്ടുണ്ട്. ഉപഭോക്താക്കളുടെ മാറുന്ന ആവശ്യങ്ങൾക്കനുസരിച്ച് വികസിപ്പിച്ചെടുത്ത ഈ എസ്‌യുവി വിപണിയിൽ മികച്ച സ്വീകാര്യത നേടുമെന്ന് ഹ്യുണ്ടായി പ്രതീക്ഷിക്കുന്നു.
Story Highlights: Hyundai Alcazar launched in India with new design, features, and competitive pricing
