വാരണാസിയിലെ ക്ഷേത്രങ്ങളിൽ നിന്ന് സായി ബാബയുടെ വിഗ്രഹങ്ങൾ നീക്കം ചെയ്യണമെന്ന് ആവശ്യപ്പെട്ട് പ്രചാരണം നടത്തിയ പ്രാദേശിക രാഷ്ട്രീയ നേതാവിനെ പൊലീസ് കസ്റ്റഡിയിലെടുത്തു. സനാതൻ രക്ഷക് ദൾ എന്ന ഹിന്ദു സംഘടനയുടെ നേതാവായ അജയ് ശർമയാണ് അറസ്റ്റിലായത്. സമാധാന ലംഘനം ആരോപിച്ചാണ് ഇയാളെ കസ്റ്റഡിയിലെടുത്തത്.
ചൊവ്വാഴ്ച ശർമയുടെ നേതൃത്വത്തിൽ പ്രദേശത്തെ നിരവധി ക്ഷേത്രങ്ങളിൽ നിന്ന് സായി ബാബയുടെ വിഗ്രഹങ്ങൾ നീക്കം ചെയ്തിരുന്നു. വിഖ്യാതമായ ബഡ ഗണേശ് ക്ഷേത്രത്തിലേത് ഉൾപ്പെടെ 14 സായി ബാബ വിഗ്രഹങ്ങളാണ് നീക്കം ചെയ്തത്. 50 ക്ഷേത്രങ്ങളിൽ കൂടി സായിബാബയുടെ വിഗ്രഹം നീക്കം ചെയ്യുമെന്നും അദ്ദേഹം പ്രഖ്യാപിച്ചു. കാശിയിൽ (വാരണാസി) ശിവ ഭഗവാനെ മാത്രമേ ആരാധിക്കാവൂ എന്നാണ് ശർമയുടെ വാദം.
ഈ സംഭവത്തെ തുടർന്ന് സായി ബാബ ഭക്തർ പ്രതിഷേധവുമായി രംഗത്തെത്തുകയും ക്ഷേത്രങ്ങളുടെ സുരക്ഷയിൽ ആശങ്ക രേഖപ്പെടുത്തുകയും ചെയ്തു. സായി ബാബ ക്ഷേത്രങ്ങളുടെ മാനേജർമാർ ഇന്നലെ യോഗം ചേരുകയും ക്ഷേത്ര പരിസരം ദുഷിപ്പിക്കാൻ ശ്രമിക്കുന്നവർക്കെതിരെ പൊലീസ് കമ്മീഷണറെ സമീപിക്കാൻ തീരുമാനിക്കുകയും ചെയ്തു.
Story Highlights: Leader of Hindu group arrested for removing Sai Baba idols from Varanasi temples, sparking protests
