വയനാട് മേപ്പാടിയിൽ വൻ ഉരുൾപൊട്ടൽ; മരണസംഖ്യ 11 ആയി; മന്ത്രിമാർ സന്ദർശനത്തിനെത്തും

വയനാട് മേപ്പാടി മുണ്ടക്കൈയിൽ വൻ ഉരുൾപൊട്ടൽ സംഭവിച്ചു. ദുരന്തത്തിൽ മരണസംഖ്യ 11 ആയി ഉയർന്നു, മരിച്ചവരിൽ ഒരു പിഞ്ചുകുഞ്ഞും ഉൾപ്പെടുന്നു. നേപ്പാൾ സ്വദേശിയാണെന്ന സൂചനയുണ്ട്. സ്ഥിതിഗതികൾ വിലയിരുത്താൻ മന്ത്രിമാർ പ്രത്യേക ചാർട്ടേഡ് വിമാനത്തിൽ വയനാട്ടിലേക്ക് എത്തും. കാലാവസ്ഥ മോശമായതിനാൽ ഹെലികോപ്റ്റർ സർവീസ് നടക്കുന്നില്ല.

ദുരന്തനിവാരണ പ്രവർത്തനങ്ങൾക്കായി വായുസേനയുടെ രണ്ട് ഹെലികോപ്റ്ററുകൾ സുളൂരിൽ നിന്ന് 7.30 ഓടെ പുറപ്പെടും. ഒരു MI 17, ഒരു ALH എന്നിവയാണ് വയനാട്ടിലേക്ക് എത്തുക. കൂടുതൽ എൻഡിആർഎഫ് സംഘം ദുരന്തഭൂമിയിലേക്ക് എത്തും. ആരോഗ്യ വകുപ്പ് ജില്ലാതല കൺട്രോൾ റൂം തുറന്നിട്ടുണ്ട്. അടിയന്തര സാഹചര്യങ്ങളിൽ ആരോഗ്യ സേവനം ലഭ്യമാക്കാൻ 8086010833, 9656938689 എന്നീ നമ്പറുകളിൽ ബന്ധപ്പെടാം.

വൈത്തിരി, കൽപ്പറ്റ, മേപ്പാടി, മാനന്തവാടി ആശുപത്രികൾ ഉൾപ്പെടെ എല്ലാ ആശുപത്രികളും സജ്ജമാണ്. രാത്രി തന്നെ എല്ലാ ആരോഗ്യ പ്രവർത്തകരും സേവനത്തിനായി എത്തിയിരുന്നു. കൂടുതൽ ആരോഗ്യ പ്രവർത്തകരുടെ സംഘത്തെ വയനാട്ടിൽ വിന്യസിക്കുമെന്ന് ആരോഗ്യ മന്ത്രി വീണാ ജോർജ് അറിയിച്ചു. ദുരന്തബാധിത പ്രദേശത്ത് രക്ഷാപ്രവർത്തനങ്ങൾ തുടരുകയാണ്.

Story Highlights: Heavy landslide in Wayanad’s Meppadi, death toll rises to 11, ministers to visit affected area