ഹരിയാനയിലും ജമ്മു കശ്മീരിലും നടന്ന നിയമസഭാ തെരഞ്ഞെടുപ്പുകളുടെ ഫലം ഇന്ന് പുറത്തുവരും. രാവിലെ എട്ടുമണിയോടെ വോട്ടെണ്ണൽ ആരംഭിക്കും. ഹരിയാനയിൽ 65 ശതമാനവും ജമ്മു കശ്മീരിൽ 63 ശതമാനവുമാണ് പോളിങ് രേഖപ്പെടുത്തിയത്. ജമ്മു കശ്മീരിൽ മൂന്ന് ഘട്ടങ്ങളിലായാണ് തെരഞ്ഞെടുപ്പ് നടന്നത്.
ഹരിയാനയിൽ കോൺഗ്രസ് തരംഗം ഉണ്ടാകുമെന്ന എക്സിറ്റ് പോൾ ഫലങ്ങൾക്ക് പിന്നാലെ, മുൻ മുഖ്യമന്ത്രി ഭൂപീന്ദർ സിങ് ഹൂഡ ഡൽഹിയിലെത്തി ഹൈക്കമാൻഡുമായി കൂടിക്കാഴ്ച നടത്തി. മുഖ്യമന്ത്രി സ്ഥാനത്തേക്കുള്ള ചർച്ചകൾ സജീവമാണ്. ഭൂപീന്ദർ സിംഗ് ഹൂഡയ്ക്കാണ് പ്രഥമ പരിഗണന. കുമാരി ഷെൽജയുടെ പേരും ചർച്ചകളിൽ ഉയർന്നുവന്നിട്ടുണ്ട്.
ജമ്മു കശ്മീരിൽ തൂക്കുമന്ത്രിസഭയ്ക്കുള്ള സാധ്യതകളാണ് സർവേകൾ സൂചിപ്പിക്കുന്നത്. സർക്കാർ രൂപീകരണത്തിൽ കോൺഗ്രസ്-എൻസി സഖ്യത്തിന് പ്രതിസന്ധി നേരിട്ടാൽ, പിഡിപി പിന്തുണ പ്രഖ്യാപിക്കാൻ മടിക്കില്ലെന്നാണ് സൂചന. എന്നാൽ, എക്സിറ്റ് പോൾ സർവേകളെ തള്ളുന്ന ബിജെപി, അവസാന ഘട്ടത്തിലും സർക്കാർ രൂപീകരിക്കുമെന്ന പ്രതീക്ഷ കൈവിട്ടിട്ടില്ല.
Story Highlights: Haryana and Jammu & Kashmir assembly election results to be announced today
