അർബുദ മരുന്നുകളുടെ ജിഎസ്ടി 5 ശതമാനമായി കുറച്ചു; ഗവേഷണ ഗ്രാന്റുകൾക്ക് നികുതി ഒഴിവാക്കി

അർബുദ ചികിത്സയ്ക്കുള്ള മരുന്നുകളുടെ ജിഎസ്ടി നിരക്ക് 12 ശതമാനത്തിൽ നിന്ന് 5 ശതമാനമായി കുറച്ചതായി ജിഎസ്ടി കൗൺസിൽ യോഗം തീരുമാനിച്ചു. വിദ്യാഭ്യാസ സ്ഥാപനങ്ങൾക്ക് ഗവേഷണത്തിനായി നൽകുന്ന ഗ്രാന്റുകൾക്ക് ജിഎസ്ടി ഒഴിവാക്കാനും യോഗം തീരുമാനിച്ചു. മെഡിക്കൽ ഇൻഷുറൻസ് പ്രീമിയത്തിന്റെ ജിഎസ്ടി കുറയ്ക്കണമെന്ന ആവശ്യം മന്ത്രിതല സമിതിക്ക് വിട്ടു.

ജിഎസ്ടി കൗൺസിൽ യോഗങ്ങൾ ഇനി മുതൽ സംസ്ഥാനങ്ങളിൽ നടത്താൻ തീരുമാനിച്ചതായി കേന്ദ്ര ധനമന്ത്രി നിർമല സീതാരാമൻ അറിയിച്ചു. കേരളത്തിന്റെ ഉൾപ്പെടെയുള്ള നിർദേശങ്ങൾ പരിഗണിച്ചാണ് ഈ തീരുമാനമെടുത്തത്. ജിഎസ്ടി കൗൺസിലിന്റെ കീഴിൽ രണ്ട് ഉപസമിതികൾ രൂപീകരിച്ചതായും അവർ വ്യക്തമാക്കി. മെഡിക്കൽ, ആരോഗ്യ ഇൻഷുറൻസ് വിഷയങ്ങൾ പഠിക്കാനാണ് ഒരു ഉപസമിതി രൂപീകരിച്ചത്. ഇൻഷുറൻസ് പ്രീമിയത്തിനുള്ള ജിഎസ്ടി കുറയ്ക്കണമെന്ന ആവശ്യം യോഗത്തിൽ ഉയർന്നിരുന്നു.

ബിഹാർ ഉപമുഖ്യമന്ത്രി സാമ്രാട്ട് ചൗധരി അധ്യക്ഷനായ സമിതി അടുത്ത മാസം റിപ്പോർട്ട് സമർപ്പിക്കും. അടുത്ത ജിഎസ്ടി കൗൺസിൽ യോഗത്തിൽ ഈ വിഷയം പരിഗണിക്കും. അതേസമയം, ജിഎസ്ടി നിരക്ക് ഉയർത്തിയതിനു ശേഷം ഓൺലൈൻ ഗെയിമിങ്ങുകളിൽ നിന്നുള്ള വരുമാനം 412 ശതമാനവും കസിനോകളിൽ നിന്നുള്ള വരുമാനം 30 ശതമാനവും വർധിച്ചതായി റിപ്പോർട്ട് ചെയ്യപ്പെട്ടു.

Story Highlights: GST Council reduces tax on cancer drugs, exempts research grants for educational institutions