സംസ്ഥാനത്ത് മഴക്കെടുതിയിൽ അഞ്ച് പേർ മരിച്ചു. കണ്ണൂരിൽ രണ്ട് പേരും പാലക്കാട് രണ്ട് പേരും തിരുവല്ലയിൽ ഒരാളുമാണ് മരിച്ചത്. കണ്ണൂരിലെ മട്ടന്നൂരിലും ചൊക്ലിയിലും വെള്ളക്കെട്ടിൽ വീണാണ് രണ്ട് പേർ മരിച്ചത്. മട്ടന്നൂർ കോളാരിയിലെ കുഞ്ഞാമിന (51) വീടിന് സമീപത്തെ വയലിലെ വെള്ളക്കെട്ടിൽ വീണ് മരിച്ചു. ചൊക്ലി ഒളവിലത്ത് റോഡരികിലെ വെള്ളക്കെട്ടിൽ പെയിന്റിങ് തൊഴിലാളിയായ ചന്ദ്രശേഖരന്റെ (63) മൃതദേഹം രാവിലെ കണ്ടെത്തി.
പാലക്കാട് കോട്ടേക്കാട് കനത്ത മഴയിൽ വീട് ഇടിഞ്ഞുവീണ് അമ്മയ്ക്കും മകനും ദാരുണാന്ത്യം സംഭവിച്ചു. കോട്ടേക്കാട് കോടക്കുന്ന് വീട്ടിൽ പരേതനായ ശിവന്റെ ഭാര്യ സുലോചന, മകൻ രഞ്ജിത് എന്നിവരാണ് മരിച്ചത്. വീട്ടിനുള്ളിൽ കിടന്നുറങ്ങുകയായിരുന്നവരാണ് മരിച്ചത്. ഫയർഫോഴ്സ് സ്ഥലത്തെത്തി മൃതദേഹം ആലത്തൂർ ആശുപത്രിയിലേക്ക് മാറ്റി.
തിരുവല്ലയിൽ വൈദ്യുതി കമ്പിയിൽ നിന്നും ഷോക്കേറ്റ് ഒരാൾ മരിച്ചു. റെജി എന്നയാളാണ് മരിച്ചത്. പുല്ല് ചെത്തുന്നതിനിടെയാണ് ഷോക്കേറ്റത്. സംസ്ഥാനത്തെ മഴക്കെടുതിയിൽ ഇന്ന് ആകെ അഞ്ച് പേരാണ് മരിച്ചത്. കനത്ത മഴയും വെള്ളപ്പൊക്കവും തുടരുന്ന സാഹചര്യത്തിൽ ജനങ്ങൾ അതീവ ജാഗ്രത പാലിക്കേണ്ടതുണ്ട്.
