മലയാറ്റൂര് ഇല്ലിത്തോട് പ്രദേശത്ത് കിണറ്റില് വീണ കുട്ടിയാനയെ അമ്മയാന രക്ഷിച്ച സംഭവം വലിയ ശ്രദ്ധ നേടി. ഇന്ന് പുലര്ച്ചെയാണ് സംഭവം നടന്നത്. സാജുവിന്റെ കിണറ്റിലാണ് കുട്ടിയാന വീണത്.
കാട്ടാനക്കൂട്ടത്തിന്റെ ശബ്ദം കേട്ട് നാട്ടുകാര് നോക്കിയപ്പോഴാണ് കുട്ടിയാന കിണറ്റില് വീണത് കണ്ടെത്തിയത്. കുട്ടിയാന കിണറ്റില് വീണ വിവരം അറിഞ്ഞ് വനംവകുപ്പ് ഉദ്യോഗസ്ഥര് സ്ഥലത്ത് എത്തിയെങ്കിലും, കാട്ടാനക്കൂട്ടം പ്രദേശത്ത് നിലയുറപ്പിച്ചിരുന്നതിനാല് ഉടന് രക്ഷാപ്രവര്ത്തനം ആരംഭിക്കാന് സാധിച്ചില്ല. തുടക്കത്തില് കാട്ടാനക്കൂട്ടത്തെ തുരത്താനുള്ള ശ്രമമാണ് വനംവകുപ്പ് നടത്തിയത്.
എന്നാല്, അതിനിടെയാണ് അമ്മയാന കുട്ടിയാനയെ വലിച്ചു കയറ്റി രക്ഷിച്ചത്. കുട്ടിയാന പുറത്തെത്തിയതിനു പിന്നാലെ കാട്ടാനക്കൂട്ടം കാടു കയറി. സംഭവസ്ഥലത്തെത്തിയ വനംവകുപ്പ് ഉദ്യോഗസ്ഥരെ നാട്ടുകാർ തടഞ്ഞു.
പ്രദേശത്തു കാട്ടാനശല്യം രൂക്ഷമാണെന്നും നിരവധി തവണ പരാതി പറഞ്ഞിട്ടും നടപടിയുണ്ടായില്ലെന്നും നാട്ടുകാർ ആരോപിച്ചു. ഉദ്യോഗസ്ഥർക്കെതിരെ മുദ്രാവാക്യം മുഴക്കി പ്രതിഷേധിച്ച നാട്ടുകാർ, കാട്ടാനശല്യത്തിനെതിരെ അടിയന്തര നടപടി ആവശ്യപ്പെട്ടു.