അന്താരാഷ്ട്ര കുറ്റവാളിയും ക്രിപ്റ്റോ കിംഗ്പിന്നുമായ ലിത്വാനിയൻ സ്വദേശി ബെഷ്യോകോവ് അലക്സെസ് (46) വർക്കലയിൽ പിടിയിലായി. ഇന്റർപോൾ തിരയുന്ന കുറ്റവാളിയായ ഇയാൾ കുരയ്ക്കണ്ണിയിലെ ഒരു ഹോംസ്റ്റേയിൽ ഭാര്യയും മക്കളുമൊത്ത് താമസിച്ചു വരികയായിരുന്നു. യുഎസ് സീക്രട്ട് സർവീസിന്റെ മോസ്റ്റ് വാണ്ടഡ് ലിസ്റ്റിൽ ഉൾപ്പെട്ടിട്ടുള്ള ബെഷ്യോകോവിനെതിരെ ഡൽഹി പാട്യാല കോടതി വാറണ്ട് പുറപ്പെടുവിച്ചിരുന്നു.
വർക്കല ഡിവൈഎസ്പി ഗോപകുമാറിന്റെ നേതൃത്വത്തിൽ വർക്കല എസ്എച്ചഒ ധിപിനും ബീച്ച് പോലീസും ചേർന്നാണ് പ്രതിയെ പിടികൂടിയത്. ഭാര്യയെയും മക്കളെയും വിദേശത്തേക്ക് കടത്തിയ ശേഷം റഷ്യയിലേക്ക് മടങ്ങാനൊരുങ്ങവെയാണ് അറസ്റ്റ്. പ്രതിയെ ആറ്റിങ്ങൽ സബ്ജയിലേക്ക് മാറ്റി പിന്നീട് ഡൽഹിയിലെ പാട്യാല കോടതിയിൽ ഹാജരാക്കുമെന്ന് പോലീസ് അറിയിച്ചു.
ലിത്വാനിയൻ പൗരനായ ബെഷ്യോകോവിന്റെ ഓപ്പറേഷൻ കേന്ദ്രം റഷ്യയിലായിരുന്നു. 2022-ൽ യുഎസ് സർക്കാരിന്റെ അനുമതിയോടെ ആരംഭിച്ച ക്രിപ്റ്റോകറൻസി എക്സ്ചേഞ്ചായ ഗാരന്റക്സിന്റെ സഹസ്ഥാപകനാണ് ഇയാൾ. രാജ്യാന്തര ക്രിമിനൽ, സൈബർ ക്രിമിനൽ സംഘടനകൾക്ക് കോടിക്കണക്കിന് ഡോളർ കള്ളപ്പണം വെളുപ്പിക്കാൻ സൗകര്യമൊരുക്കിയതിന് മാർച്ച് 7 ന് യുഎസ് നീതിന്യായ വകുപ്പ് ഇയാൾക്കെതിരെ കുറ്റപത്രം സമർപ്പിച്ചു.
റാൻസംവെയർ, കമ്പ്യൂട്ടർ ഹാക്കിംഗ്, മയക്കുമരുന്ന് ഇടപാടുകൾ എന്നിവയിൽ നിന്നുള്ള ക്രിമിനൽ സംഘടനകളുടെ വരുമാനം വെളുപ്പിച്ചാണ് ബെഷ്യോകോവ് കോടികൾ സമ്പാദിച്ചതെന്ന് സിബിഐ പ്രസ്താവനയിൽ പറയുന്നു. 2021 നും 2024 നും ഇടയിൽ, ബ്ലാക്ക് ബാസ്റ്റ, പ്ലേ, കോണ്ടി റാൻസംവെയർ ഗ്രൂപ്പുകളിൽ നിന്നുള്ള വരുമാനം ഉൾപ്പെടെ ദശലക്ഷക്കണക്കിന് യുഎസ് ഡോളർ റാൻസംവെയർ വരുമാനത്തിൽ ഗാരന്റക്സ് വെളുപ്പിച്ചിട്ടുണ്ട്. അമേരിക്കയിലെ കള്ളപ്പണക്കേസിൽ പ്രതിയാണ് ബെഷ്യോകോവ്.
2019 ഏപ്രിൽ മുതൽ ഗാരന്റക്സ് കുറഞ്ഞത് 96 ബില്യൺ (83 ലക്ഷം കോടി) ഡോളറിന്റെ ക്രിപ്റ്റോകറൻസി ഇടപാടുകൾ നടത്തിയിട്ടുണ്ടെന്ന് യുഎസ് നീതിന്യായ വകുപ്പ് കഴിഞ്ഞ ആഴ്ച റിപ്പോർട്ട് പുറത്തുവിട്ടു. കഴിഞ്ഞയാഴ്ച, യുഎസ്, ജർമ്മനി, ഫിൻലാൻഡ് സുരക്ഷാ ഏജൻസികളുടെ സംയുക്ത ഓപ്പറേഷനിൽ ഗാരന്റക്സിന്റെ ഡൊമെയ്നുകളും സെർവറുകളും പിടിച്ചെടുക്കുകയും 28 മില്യൺ ഡോളറിന്റെ ക്രിപ്റ്റോകറൻസി മരവിപ്പിക്കുകയും ചെയ്തിരുന്നു. ഉത്തരകൊറിയയുടെ ഹാക്കിംഗ് സ്ക്വാഡായ ലാസർ ഗ്രൂപ്പിന് വേണ്ടിയും ഗാരന്റക്സ് പണം വെളുപ്പിച്ചതായി റിപ്പോർട്ടുണ്ട്.
Story Highlights: International criminal and crypto kingpin arrested in Varkala, Kerala.
കളമശ്ശേരി സ്ഫോടനക്കേസിലെ പ്രതി ഡൊമിനിക് മാർട്ടിന്റെ വിദേശ ബന്ധങ്ങൾ അന്വേഷിക്കാൻ ഇന്റർപോളിന്റെ സഹായം Read more
വിഴിഞ്ഞം സ്വദേശി യഹിയ ഖാനെ കോട്ടയം സെക്ഷൻസ് കോടതി ശിക്ഷിച്ചു. ബുദ്ധിമാന്ദ്യമുള്ള പ്രായപൂർത്തിയാകാത്ത Read more
