CPI Leadership Expresses Concern Over LDF Government in Kerala

കേരളത്തിലെ രണ്ടാം പിണറായി സർക്കാരിന്റെ പ്രവർത്തനത്തിൽ സിപിഐ നേതൃത്വം ആശങ്ക പ്രകടിപ്പിച്ചിരിക്കുകയാണ്. തിരുവനന്തപുരത്ത് ചേർന്ന സംസ്ഥാന നിർവാഹക സമിതി യോഗത്തിൽ ഇപ്പോഴത്തെ അവസ്ഥയിൽ തിരുത്തൽ നടപടികളില്ലാതെ മുന്നോട്ടു പോകാൻ സാധിക്കില്ലെന്നും അല്ലാത്തപക്ഷം ബംഗാളിലേക്ക് അധികദൂരമില്ലെന്നുമാണ് ചർച്ചയായത്. എന്നാൽ, മുഖ്യമന്ത്രി പിണറായി വിജയനെ ചോദ്യം ചെയ്യാൻ ആർക്കും ധൈര്യമില്ലെന്നതാണ് വസ്തുത.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

തുടർഭരണത്തിൽ പാർട്ടിയും നേതാക്കളും ജനങ്ങളിൽ നിന്നകന്നത് മുന്നണിയുടെ അടിത്തറ തകർത്തെന്ന് സിപിഐയിൽ ഒരു വിഭാഗം വിലയിരുത്തുന്നു. രാജ്യസഭാംഗം പി. സന്തോഷ് കുമാറിന്റെ അഭിപ്രായപ്രകടനത്തെ തുടർന്നാണ് ഇതിലേക്ക് ചർച്ച തിരിഞ്ഞത്. സിപിഎമ്മിനും മുഖ്യമന്ത്രി പിണറായി വിജയനുമെതിരെ ആവർത്തിച്ചുയരുന്ന ആക്ഷേപങ്ങൾ ഗൗരവതരമാണെന്നും പാർട്ടിയുടെ അടിസ്ഥാന വോട്ട് ബാങ്കിലുണ്ടായ ചോർച്ച ഇതാണ് കാണിക്കുന്നതെന്നും അദ്ദേഹം ചൂണ്ടിക്കാട്ടി.

തൃശൂർ വിജയത്തിന്റെ പശ്ചാത്തലത്തിൽ കേരളത്തിൽ ബിജെപി സ്വാധീനമുറപ്പിക്കുന്ന സാഹചര്യവും ദേശീയ രാഷ്ട്രീയത്തിലെ സിപിഐയും സിപിഎമ്മും കോൺഗ്രസ് നേതൃത്വം നൽകുന്ന ഇന്ത്യ മുന്നണിയിലാണെന്നതും പരാമർശിക്കപ്പെട്ടു. സിപിഐയുടെ ചില ജില്ലാ കമ്മിറ്റികളിൽ മുന്നണി മാറ്റം ചർച്ചയായിരുന്നെങ്കിലും അത്തരം ചർച്ചകൾക്ക് സംസ്ഥാന സമിതി പ്രോത്സാഹനം നൽകിയില്ല. എന്നാൽ, സിപിഎമ്മിന്റെ അപചയം മുൻനിർത്തി, കേരളത്തിൽ ഇടതുമുന്നണി ഭാവിയിൽ ഇതേനിലയിൽ തുടരണമെന്നില്ലെന്ന അഭിപ്രായം സിപിഐ നേതൃയോഗത്തിലുയരുന്നത് മുന്നണിമാറ്റ ചിന്തയുടെ നാന്ദിയായാണ് വിലയിരുത്തപ്പെടുന്നത്.