കോഴിക്കോട് നാദാപുരം തണ്ണീർ പന്തലിൽ ഒരു സ്വകാര്യ ബസിലെ ജീവനക്കാർ അക്രമത്തിന് ഇരയായി. ബുധനാഴ്ച വൈകുന്നേരം സി സി മുക്കിനടുത്താണ് സംഭവം നടന്നത്. കാറിന് വഴി കൊടുക്കാത്തതിന്റെ പേരിൽ ഒരു സംഘം ആളുകൾ ബസ് തടഞ്ഞുനിർത്തി ഡ്രൈവർ ഹരികൃഷ്ണനെയും കണ്ടക്ടർ സിജിനെയും മർദ്ദിക്കുകയായിരുന്നു.
യാത്രക്കാരുടെ സാന്നിധ്യത്തിൽ വെച്ച് അക്രമികൾ അസഭ്യവർഷവും ഭീഷണിയും മുഴക്കി. പരിക്കേറ്റ ജീവനക്കാർ നാദാപുരം ഗവ. താലൂക്ക് ആശുപത്രിയിൽ പ്രാഥമിക ചികിത്സ തേടി. കണ്ണിന് ഗുരുതരമായി പരിക്കേറ്റ കണ്ടക്ടറെ കോഴിക്കോട് ആശുപത്രിയിലേക്ക് മാറ്റി. സംഭവത്തിൽ ഇരകൾ നാദാപുരം പൊലീസിൽ പരാതി നൽകിയിട്ടുണ്ട്.
മറ്റൊരു സംഭവത്തിൽ, കാസർകോഡ് ബന്തിയോട്ടിൽ ആയുധങ്ങളുമായി സഞ്ചരിച്ച കർണാടക സ്വദേശി പൊലീസിന്റെ പിടിയിലായി. ചൊവ്വാഴ്ച പുലർച്ചെ ബന്തിയോട്-പെർമുദെ റോഡിലെ ഗോളിനടുക്കയിൽ വെച്ചാണ് അറസ്റ്റ് നടന്നത്. പൊലീസിനെ കണ്ട് വേഗത്തിൽ രക്ഷപ്പെടാൻ ശ്രമിച്ച കർണാടക രജിസ്ട്രേഷൻ കാർ പിന്തുടർന്ന് പിടികൂടുകയായിരുന്നു. കാറിന്റെ മാറ്റിനടിയിൽ വടിവാളും ഡിക്കിയിൽ കത്തികളും കണ്ടെത്തി. കയ്യുറകളും മുഖംമൂടിയും കൂടി കണ്ടെടുത്തു. ബണ്ട്വാൾ സ്വദേശി ആദി ജോക്കിൻ കാസ്റ്റിലിനോയെ അറസ്റ്റ് ചെയ്ത് ആയുധ നിയമപ്രകാരം കേസെടുത്തു.
Story Highlights: Private bus staff assaulted in Nadapuram, Karnataka native arrested with weapons in Kasaragod
