ബിഎംഡബ്ല്യു മോട്ടോറാഡ് ഇന്ത്യയിൽ പുതിയ പ്രീമിയം ഇവി സ്കൂട്ടർ അവതരിപ്പിച്ചിരിക്കുകയാണ്. സിഇ02 എന്ന് പേരിട്ടിരിക്കുന്ന ഈ ഇലക്ട്രിക് സ്കൂട്ടർ, കമ്പനി നേരത്തെ ഇന്ത്യയിൽ അവതരിപ്പിച്ച സിഇ04 എന്ന മോഡലിന്റെ ഒരു ചെറിയ പതിപ്പാണ്. 4.49 ലക്ഷം രൂപയാണ് ഈ സ്കൂട്ടറിന്റെ വില. ടിവിഎസുമായി സഹകരിച്ചാണ് ബിഎംഡബ്ല്യു ഈ സ്കൂട്ടർ വികസിപ്പിച്ചെടുത്തത്.
കോസ്മിക് ബ്ലാക്ക്, കോസ്മിക് ബ്ലാക്ക് 2 എന്നീ രണ്ട് നിറങ്ങളിലാണ് സിഇ02 ലഭ്യമാകുന്നത്. ഈസി റൈഡ് സിറ്റി സ്കൂട്ടർ ആഗ്രഹിക്കുന്നവരെയാണ് ഈ പ്രീമിയം ബ്രാൻഡ് ലക്ഷ്യമിടുന്നത്. രാജ്യത്തിന്റെ വിവിധ ഭാഗങ്ങളിലുള്ള ഡീലർമാർ വഴി ഇതിന്റെ ടെസ്റ്റ് റൈഡ് നടത്താനും വാങ്ങാനും സാധിക്കും. ഇത് ഒരു ഇ-മോട്ടോർ ബൈക്കോ ഇ-സ്കൂട്ടറോ അല്ല, മറിച്ച് ഒരു ‘ഇപാർക്കൗറർ’ ആണെന്നാണ് ബിഎംഡബ്ല്യു വിശേഷിപ്പിക്കുന്നത്.
ഡ്യുവൽ ലൂപ്പ് സ്റ്റീൽ ഫ്രെയിമിലാണ് ഈ ഇവി നിർമ്മിച്ചിരിക്കുന്നത്. 239 mm ഫ്രണ്ട് ഡിസ്കും 220 mm റിയർ ഡിസ്കും ബ്രേക്കിംഗ് സംവിധാനം നൽകുന്നു. എബിഎസും ഇതിൽ ഉൾപ്പെടുത്തിയിട്ടുണ്ട്. 14 ഇഞ്ച് അലോയ് വീലുകളിൽ 120/80 സെക്ഷൻ ഫ്രണ്ട്, 150/70 സെക്ഷൻ റിയർ ടയറുകളാണ് ഘടിപ്പിച്ചിരിക്കുന്നത്. 3.9 കിലോവാട്ട് ബാറ്ററി പാക്കാണ് ഇതിലുള്ളത്. ഒറ്റ ചാർജിൽ 108 കിലോമീറ്റർ റേഞ്ച് ലഭിക്കുമെന്ന് കമ്പനി അവകാശപ്പെടുന്നു. സ്റ്റാൻഡേർഡ് 0.9kW ചാർജർ ഉപയോഗിച്ച് 5 മണിക്കൂറും 12 മിനിറ്റും കൊണ്ട് ബാറ്ററി പൂർണമായി ചാർജ് ചെയ്യാം. 1.5kW യൂണിറ്റ് ഉപയോഗിക്കുമ്പോൾ ചാർജിംഗ് സമയം 3 മണിക്കൂറും 30 മിനിറ്റുമായി കുറയ്ക്കാൻ കഴിയും.
Story Highlights: BMW launches premium electric scooter CE02 in India at Rs 4.49 lakh
