BJP's K Surendran on Palakkad by-election: Vote decline analysis

ഉപതെരഞ്ഞെടുപ്പിൽ കഴിഞ്ഞ പ്രാവശ്യത്തെ സിറ്റിംഗ് സീറ്റുകൾ എല്ലാവരും നിലനിർത്തിയെന്ന് ബിജെപി സംസ്ഥാന അധ്യക്ഷൻ കെ സുരേന്ദ്രൻ പ്രസ്താവിച്ചു. എന്നാൽ, പാലക്കാട് ബിജെപിക്ക് വോട്ട് കുറഞ്ഞതിൽ ആത്മപരിശോധന നടത്തുമെന്നും ജനപിന്തുണ ആർജിക്കാൻ പരിശ്രമിക്കുമെന്നും അദ്ദേഹം കൂട്ടിച്ചേർത്തു. പാലക്കാട് ബിജെപി വിജയിക്കുമെന്നാണ് പ്രതീക്ഷിച്ചതെങ്കിലും, ഉപതെരഞ്ഞെടുപ്പുകളിൽ ബിജെപിക്ക് വോട്ടുകൾ കുറയാറാണ് പതിവെന്നും അദ്ദേഹം വ്യക്തമാക്കി.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

കോൺഗ്രസ് വർഗീയ ശക്തികളുമായി കൂട്ടുചേർന്ന് അതിഭീകരമായി പ്രചാരണം നടത്തിയതായി സുരേന്ദ്രൻ ആരോപിച്ചു. സംസ്ഥാന സർക്കാരിനെതിരെ ശക്തമായ പ്രതിഷേധം ഉണ്ടായിട്ടും പ്രധാന പ്രതിപക്ഷത്തിന് ചേലക്കരയിൽ വിജയിക്കാനായില്ലെന്നും അദ്ദേഹം ചൂണ്ടിക്കാട്ടി. UDF നെ ടെൻഷൻ ആക്കാനാണ് ഫേസ്ബുക്ക് പോസ്റ്റിട്ടതെന്നും അദ്ദേഹം വെളിപ്പെടുത്തി.

ഇ ശ്രീധരന് ലഭിച്ചത് എല്ലാം ബിജെപി വോട്ടുകളല്ലെന്നും, ലോക്സഭാ തിരഞ്ഞെടുപ്പിൽ കിട്ടിയത് രാഷ്ട്രീയ വോട്ടുകൾ ആയിരുന്നുവെന്നും സുരേന്ദ്രൻ പറഞ്ഞു. ഈ തിരഞ്ഞെടുപ്പിൽ വോട്ട് എങ്ങനെ കുറഞ്ഞു എന്ന് ആത്മപരിശോധന നടത്തുമെന്നും, തദ്ദേശ തെരഞ്ഞെടുപ്പിന് മുൻപ് ആവശ്യമായ പ്രവർത്തനം നടത്തി ജനപിന്തുണ നേടുമെന്നും അദ്ദേഹം ഉറപ്പു നൽകി.