ആപ്പിൾ കമ്പനി ഇന്ത്യയിലെ ഉപഭോക്താക്കൾക്ക് സ്പൈവെയർ ആക്രമണത്തെക്കുറിച്ച് മുന്നറിയിപ്പ് നൽകി. ഇസ്രയേലിലെ എൻഎസ്ഒ ഗ്രൂപ്പിന്റെ പെഗാസസിന് സമാനമായ മെർസിനറി സ്പൈവെയർ ഉപയോഗിച്ചാണ് ആക്രമണമെന്ന് കമ്പനി അറിയിച്ചു. ഈ സ്പൈവെയർ ഉപഭോക്താക്കളുടെ ആപ്പിൾ ഉപകരണങ്ങൾ വിദൂരത്തിരുന്ന് നിയന്ത്രിക്കാൻ സഹായിക്കുന്നു. ഇന്ത്യക്ക് പുറമെ 97 രാജ്യങ്ങളിലെ ഉപഭോക്താക്കൾക്കും ഈ മുന്നറിയിപ്പ് ലഭിച്ചിട്ടുണ്ട്.
ഏപ്രിലിൽ ആപ്പിൾ തങ്ങളുടെ ബ്ലോഗിൽ പറഞ്ഞത് സ്പൈവെയർ ആക്രമണങ്ങൾ കുറച്ച് പേരെ മാത്രം ലക്ഷ്യമിട്ടുള്ളതാണെന്നായിരുന്നു. എന്നാൽ ഇതിലൂടെ ഹാക്കർമാർ ദശലക്ഷക്കണക്കിന് ഡോളർ നേടിയിരുന്നു. ഈ സങ്കീർണമായ സ്പൈവെയർ തിരിച്ചറിയാൻ ബുദ്ധിമുട്ടാണെന്നും കമ്പനി വ്യക്തമാക്കി. പതിവ് ആക്രമണങ്ങളിൽ നിന്ന് വ്യത്യസ്തമായി കൂടുതൽ സങ്കീർണമാണ് ഈ ആക്രമണമെന്നും റിപ്പോർട്ടിൽ പറയുന്നു.
ജമ്മു കശ്മീർ മുൻ മുഖ്യമന്ത്രി മെഹബൂബ് മുഫ്തിയുടെ മകൾ ഇൽതിജ മുഫ്തി തന്റെ ഫോൺ പെഗാസസ് സ്പൈവെയർ ഉപയോഗിച്ച് ഹാക്ക് ചെയ്തുവെന്ന് ആരോപിച്ചിരുന്നു. മുൻപ് രാഹുൽ ഗാന്ധിയടക്കം പ്രതിപക്ഷ നേതാക്കളും സമാന ആരോപണം ഉന്നയിച്ചിരുന്നു. 2022-ൽ സുപ്രീം കോടതി നിർദേശപ്രകാരം ഇത് അന്വേഷിച്ചെങ്കിലും തെളിവില്ലെന്ന് പറഞ്ഞ് തള്ളി. കേന്ദ്രസർക്കാർ അന്വേഷണത്തോട് സഹകരിക്കാത്തതിനെ ചൊല്ലി വിമർശനവും ഉയർന്നിരുന്നു.
