Ammu's death case: No bail for three accused, remanded for 14 days

പത്തനംതിട്ടയിലെ നഴ്സിംഗ് വിദ്യാര്ഥി അമ്മുവിന്റെ മരണക്കേസില് മൂന്ന് പ്രതികള്ക്കും ജാമ്യം നിഷേധിച്ചു. പത്തനംതിട്ട ജുഡീഷ്യല് ഒന്നാം ക്ലാസ് മജിസ്ട്രേറ്റ് കോടതിയാണ് പ്രതികളെ 14 ദിവസത്തേക്ക് റിമാന്ഡ് ചെയ്തത്. അലീന ദിലീപ്, അഷിത എ.ടി., അഞ്ജന മധു എന്നിവരാണ് പ്രതികള്. പ്രതികളെ ജയിലിലേക്ക് കൊണ്ടുപോകുന്നതിനിടെ എബിവിപി പ്രവര്ത്തകര് പ്രതിഷേധിച്ചു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

കേസിന്റെ ഗൗരവം പരിഗണിച്ച് പ്രതികളെ റിമാന്ഡ് ചെയ്യണമെന്നാണ് പൊലീസ് കോടതിയില് ആവശ്യപ്പെട്ടത്. ജാമ്യം നല്കിയാല് അന്വേഷണം തടസ്സപ്പെടുത്താന് ഇടപെട്ടേക്കുമെന്നും വാദിച്ചു. കൂടുതല് ചോദ്യം ചെയ്യേണ്ടതുണ്ടെന്നും കസ്റ്റഡിയില് വാങ്ങി ചോദ്യം ചെയ്യേണ്ട സാഹചര്യം നിലനില്ക്കുന്നുവെന്നും പൊലീസ് കോടതിയെ അറിയിച്ചു. എന്നാല് പ്രതിഭാഗം ഇടക്കാല ജാമ്യം ആവശ്യപ്പെട്ടു.

അമ്മുവിന്റെ മരണത്തിലെ ദുരൂഹത നീക്കാന് ഉന്നതതല അന്വേഷണം ആവശ്യപ്പെട്ട് കുടുംബം സര്ക്കാരിനെ സമീപിക്കും. ലോഗ് ബുക്ക് കാണാതായതില് ദുരൂഹതയുണ്ടെന്നും അത് കണ്ടെത്താന് പ്രതികളെ കസ്റ്റഡിയില് വിടണമെന്നും അന്വേഷണ ഉദ്യോഗസ്ഥന് സി.ഐ. ഷിബു കുമാര് കോടതിയെ അറിയിച്ചു. ജാമ്യം കൊടുത്താല് പ്രതികള് തെളിവ് നശിപ്പിക്കുമെന്നും മൊബൈല് ഫോണില് തെളിവുകള് ഉണ്ടെന്നും അദ്ദേഹം വ്യക്തമാക്കി.