ആമസോണും ഫ്ലിപ്കാർട്ടും വാർഷിക ഓഫർ മേള ആരംഭിക്കുന്നു. ആമസോൺ ഗ്രേറ്റ് ഇന്ത്യൻ ഫെസ്റ്റിവൽ സെയിലും ഫ്ലിപ്കാർട്ട് ബിഗ് ബില്യൺ ഡേയ്‌സ് വിൽപ്പനയുമാണ് തുടങ്ങുന്നത്. ആമസോൺ പ്രൈം അംഗങ്ങൾക്ക് സെപ്റ്റംബർ 26ന് അർദ്ധരാത്രി മുതൽ സെയിലിൽ പങ്കെടുക്കാം. സാധാരണ ഉപയോക്താക്കൾക്ക് സെപ്റ്റംബർ 28 മുതൽ സെയിലിൽ പങ്കെടുക്കാനാകും. ഫ്ലിപ്കാർട്ട് പ്ലസ് അംഗങ്ങൾക്ക് സെപ്റ്റംബർ 26ന് തന്നെ സെയിലിൽ പ്രവേശനം ലഭിക്കും.
ആമസോൺ ഗ്രേറ്റ് ഇന്ത്യൻ ഫെസ്റ്റിവൽ സെയിലിൽ സ്മാർട്ട്ഫോണുകൾക്ക് 80,000 രൂപ വരെ കിഴിവ് ലഭിക്കുമെന്നാണ് അറിയിപ്പ്. വൺപ്ലസിന്റെയും സാംസങ്ങിന്റെയും സ്മാർട്ട് ഫോണുകൾ ഉൾപ്പടെ മികച്ച ഡീലുകളിൽ ലഭ്യമാകും. ഫ്ലിപ്കാർട്ടിലും നിരവധി സ്മാർട്ട്ഫോണുകൾക്ക് വൻ വില കിഴിവ് പ്രഖ്യാപിച്ചിട്ടുണ്ട്. ഡെബിറ്റ്/ക്രെഡിറ്റ്, ഈസി ഇഎംഐ ഇടപാടുകളിൽ 10 ശതമാനം അധിക കിഴിവും ലഭിക്കും.
ഫ്ലിപ്കാർട്ട് ബിഗ് ബില്യൺ ഡേയ്‌സിൽ ഗൂഗിൾ പിക്സൽ 8 സ്മാർട്ട്ഫോൺ 75,999 രൂപയിൽ നിന്ന് 40,000 രൂപയ്ക്ക് ലഭ്യമാകുമെന്നാണ് റിപ്പോർട്ടുകൾ. അതേസമയം, സാംസങ് ഗാലക്‌സി എസ് 23 മോഡൽ 89,999 രൂപയിൽ നിന്ന് 40,000 രൂപയ്ക്ക് വിൽക്കുമെന്നും അറിയിപ്പുണ്ട്. ഇരു കമ്പനികളുടെയും സെയിലുകളിൽ മറ്റ് നിരവധി ഉൽപ്പന്നങ്ങൾക്കും വൻ വിലക്കിഴിവ് പ്രതീക്ഷിക്കുന്നു.
Story Highlights: Amazon and Flipkart launch festive sales with huge discounts on smartphones and other products
