ദേശീയ വനിതാ കമ്മീഷൻ അജാസ് ഖാന് നോട്ടീസ് അയച്ചു. ‘ഹൗസ് അറസ്റ്റ്’ എന്ന റിയാലിറ്റി ഷോയിലെ അശ്ലീല ഉള്ളടക്കത്തിനെതിരെ വ്യാപക പ്രതിഷേധം ഉയർന്നതിനെ തുടർന്നാണ് നടപടി. ഉല്ലൂ എന്ന ഒടിടി പ്ലാറ്റ്ഫോമിൽ സംപ്രേക്ഷണം ചെയ്ത ഷോയിൽ മത്സരാർത്ഥികളെ കൊണ്ട് അശ്ലീല കാര്യങ്ങൾ ചെയ്യിപ്പിച്ചതായി ആരോപണമുണ്ട്.
മത്സരാർത്ഥികളെ കൊണ്ട് അശ്ലീല കാര്യങ്ങൾ ചെയ്യിക്കുന്ന വീഡിയോ വ്യാപകമായി പ്രചരിച്ചിരുന്നു. ഈ ദൃശ്യങ്ങൾ സ്ത്രീത്വത്തെ അപമാനിക്കുന്നതാണെന്ന് വനിതാ കമ്മീഷൻ ചൂണ്ടിക്കാട്ടി. അജാസ് ഖാൻ മെയ് 9ന് കമ്മീഷന് മുമ്പാകെ ഹാജരാകണമെന്നും നിർദേശിച്ചിട്ടുണ്ട്.
ഷോയ്ക്കെതിരെ നടപടിയെടുക്കുമെന്ന് ബിജെപി എംപി നിഷികാന്ത് ദുബെ ഉറപ്പുനൽകി. ശിവസേനാ ഉദ്ദവ് വിഭാഗം നേതാവ് പ്രിയങ്കാ ചതുർവേദിയും നിയമനടപടി ആവശ്യപ്പെട്ടിട്ടുണ്ട്. സംഭവത്തിൽ കടുത്ത നടപടി സ്വീകരിക്കുമെന്ന് വനിതാ കമ്മീഷൻ ഉറപ്പ് നൽകി.
നേരത്തെ ഇന്ത്യാ ഗോട്ട് ലേറ്റൻറ് എന്ന പരിപാടിയിലും സമാനമായ വിവാദം ഉണ്ടായിരുന്നു. അന്ന് അവതാരകർ നടത്തിയ അശ്ലീല പരാമർശത്തിനെതിരെ പൊലീസ് കേസെടുത്തിരുന്നു. കഴിഞ്ഞ വർഷം മാർച്ച് 14 ന്, അശ്ലീല ഉള്ളടക്കം നിറഞ്ഞ 18 ഒടിടി പ്ലാറ്റ്ഫോമുകൾ കേന്ദ്ര സർക്കാർ ബ്ലോക്ക് ചെയ്തിരുന്നു.
Story Highlights: The National Commission for Women has issued a notice to Ajaz Khan regarding obscene content in the reality show ‘House Arrest’ on the Ulloo OTT platform.
