High Court Cancels Debarment in Veterinary Student Suicide Case

പൂക്കോട് വെറ്ററിനറി സർവ്വകലാശാലയിലെ വിദ്യാർത്ഥി ജെ എസ് സിദ്ധാർത്ഥന്റെ ആത്മഹത്യ കേസിൽ പ്രതികളായ വിദ്യാർത്ഥികളെ ഡീബാർ ചെയ്ത സർവ്വകലാശാലയുടെ നടപടി ഹൈക്കോടതി റദ്ദാക്കി. വിദ്യാർത്ഥികളുടെ മൂന്നു വർഷത്തെ അഡ്മിഷൻ വിലക്കും സിംഗിൾ ബെഞ്ച് റദ്ദാക്കിയതായി റിപ്പോർട്ടുകൾ സൂചിപ്പിക്കുന്നു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ഈ സാഹചര്യത്തിൽ, പുതിയ അന്വേഷണം നടത്താൻ സർവ്വകലാശാലയുടെ ആന്റി റാഗിംഗ് സ്ക്വാഡിന് ഹൈക്കോടതി നിർദ്ദേശം നൽകിയിട്ടുണ്ട്. നാലു മാസത്തിനുള്ളിൽ അന്വേഷണം പൂർത്തിയാക്കണമെന്നും, അന്വേഷണം പൂർത്തിയാകുന്നതുവരെ പ്രതികളായ വിദ്യാർത്ഥികൾക്ക് പഠനം തുടരാനുള്ള അവസരം നൽകണമെന്നും കോടതി നിർദ്ദേശിച്ചു. നടപടിക്രമങ്ങൾ പാലിക്കാതെയുള്ള സർവ്വകലാശാലയുടെ നടപടി റദ്ദാക്കണമെന്നാവശ്യപ്പെട്ട് കേസിലെ പ്രതികളായ വിദ്യാർത്ഥികളാണ് ഹൈക്കോടതിയെ സമീപിച്ചത്.

കഴിഞ്ഞ ഫെബ്രുവരിയിലാണ് സിദ്ധാർത്ഥിനെതിരെ ക്രൂരമായ സംഭവം നടന്നത്. ക്ലാസിലെ ഒരു വിദ്യാർത്ഥിനിയോട് മോശമായി പെരുമാറിയെന്ന ആരോപണത്തെ തുടർന്നായിരുന്നു സീനിയർ വിദ്യാർത്ഥികളുടെ ആദ്യ മർദനം. തുടർന്ന് ഹോസ്റ്റൽ നടുമുറ്റത്തെ ആൾക്കൂട്ട വിചാരണയിലെ കടുത്ത മാനസിക സമ്മർദ്ദമാണ് സിദ്ധാർത്ഥനെ ആത്മഹത്യയിലേക്ക് നയിച്ചതെന്ന് കരുതപ്പെടുന്നു. പോസ്റ്റ്മോർട്ടം റിപ്പോർട്ടിൽ സിദ്ധാർത്ഥന്റെ ശരീരത്തിൽ മർദനമേറ്റ പാടുകൾ കണ്ടെത്തിയിരുന്നു. സംഭവത്തിൽ സീനിയർ വിദ്യാർത്ഥികളായ പന്ത്രണ്ട് പേർക്കെതിരെ പൊലീസ് കേസെടുത്ത് അറസ്റ്റ് ചെയ്തിരുന്നു.