കഴക്കൂട്ടം: തിരുവനന്തപുരം കഴക്കൂട്ടത്ത് എംഡിഎംഎ കൈവശം വച്ചതിന് യുവാവ് പിടിയിലായി. തമ്പാനൂർ സ്വദേശിയായ വിഷ്ണു എസ് കുമാർ (24) ആണ് അറസ്റ്റിലായത്. പ്രതിയിൽ നിന്ന് 10 ഗ്രാം എംഡിഎംഎയാണ് പൊലീസ് കണ്ടെടുത്തത്.
ബംഗളുരുവിൽ നിന്ന് വാങ്ങി കച്ചവടത്തിനായി കൊണ്ടുവന്ന എംഡിഎംഎയാണ് പൊലീസ് പിടികൂടിയത്. ബംഗളുരു-കന്യാകുമാരി എക്സ്പ്രസ് ട്രെയിനിൽ കഴക്കൂട്ടം റെയിൽവേ സ്റ്റേഷനിൽ വന്നിറങ്ങിയപ്പോഴാണ് യുവാവ് പിടിയിലായത്. പവർ ബാങ്കിനുള്ളിൽ രണ്ടു കവറുകളിലായി സിന്തറ്റിക് ലഹരി ഒളിപ്പിച്ചു വച്ചിരുന്നതായി പൊലീസ് പറഞ്ഞു.
അടിപിടി കേസുകളിൽ പ്രതിയായിരുന്ന വിഷ്ണു എസ് കുമാർ ആദ്യമായാണ് ലഹരിക്കേസിൽ പിടിയിലാകുന്നത്. രഹസ്യ വിവരത്തിൻ്റെ അടിസ്ഥാനത്തിൽ ഡാൻസാഫ് ടീമും തുമ്പ പൊലീസും സംയുക്തമായി നടത്തിയ നീക്കത്തിലാണ് പ്രതിയെ പിടികൂടിയത്. ലഹരി മരുന്നുകളുടെ വ്യാപനം തടയുന്നതിനായി പൊലീസ് കർശന നടപടികൾ സ്വീകരിച്ചു വരികയാണ്.
Story Highlights: Man arrested in Thiruvananthapuram with 10 grams of MDMA bought from Bengaluru for trade.
