പാലക്കാട് നഗരസഭ അധ്യക്ഷ പ്രമീള ശശിധരൻ ബിജെപി നേതൃത്വത്തിനെതിരെ രൂക്ഷ വിമർശനം ഉന്നയിച്ചിരിക്കുകയാണ്. പാലക്കാട് ഉപതെരഞ്ഞെടുപ്പിലെ തോൽവിക്ക് കാരണം സി. കൃഷ്ണകുമാറിന്റെ സ്ഥാനാർത്ഥിത്വമാണെന്ന് അവർ തുറന്നടിച്ചു. വോട്ട് ചേർച്ചയിൽ നഗരസഭാ ഭരണത്തെ പഴിചാരിയ ജില്ലാ നേതൃത്വത്തെയും അവർ വിമർശിച്ചു. അങ്ങാടിയിൽ തോറ്റതിന് അമ്മയോട് എന്നപോലെയാണ് ബിജെപി നേതൃത്വം ഇപ്പോൾ നഗരസഭയോടെ പെരുമാറുന്നതെന്ന് പ്രമീള ശശിധരൻ കുറ്റപ്പെടുത്തി.
നഗരസഭ ഭരണം മുന്നോട്ട് കൊണ്ടു പോകേണ്ടത് ജില്ല നേതൃത്വമാണെന്ന് പ്രമീള ശശിധരൻ പറഞ്ഞു. ഒരേ സ്ഥാനാർത്ഥി വേണ്ട എന്ന് തുടക്കത്തിൽ പറഞ്ഞിരുന്നുവെന്നും, എന്നാൽ സംസ്ഥാന നേതൃത്വമാണ് കൃഷ്ണകുമാറിനെ തീരുമാനിച്ചതെന്നും അവർ വ്യക്തമാക്കി. സ്ഥാനാർത്ഥി പ്രഖ്യാപനത്തിന് ശേഷം കൗൺസിലർമാർ ഒരുമിച്ച് പ്രവർത്തിച്ചുവെന്നും, എന്നാൽ മറ്റൊരു സ്ഥാനാർത്ഥി ആയിരുന്നെങ്കിൽ ഇത്ര വലിയ തോൽവി സംഭവിക്കില്ലായിരുന്നുവെന്നും അവർ അഭിപ്രായപ്പെട്ടു.
തൻ്റെ വാർഡിൽ എല്ലാ വോട്ടും കിട്ടിയെന്ന് പ്രമീള ശശിധരൻ അവകാശപ്പെട്ടു. കൃഷ്ണകുമാറിൻ്റെ വോട്ട് കുറഞ്ഞത് നേതൃത്വം പരിശോധിക്കണമെന്നും അവർ ആവശ്യപ്പെട്ടു. പൊതുജന അഭിപ്രായം മാനിച്ച് തീരുമാനങ്ങൾ സ്വീകരിക്കണമെന്നും, ജനങ്ങൾ എപ്പോഴും ഒരേ സ്ഥാനാർത്ഥി വേണ്ടെന്നാണ് പറയുന്നതെന്നും അവർ ചൂണ്ടിക്കാട്ടി. വേറെ സ്ഥാനാർത്ഥി ഇല്ലേയെന്ന ചോദ്യം ഉയരുന്നുണ്ടെന്നും, ഈ കാര്യം സംസ്ഥാന ഘടകത്തോട് അറിയിച്ചിരുന്നുവെന്നും പ്രമീള ശശിധരൻ വ്യക്തമാക്കി.
Story Highlights: Palakkad municipality chairperson Pramila Sasidharan criticizes BJP leadership over election defeat
