Priyanka Gandhi thanks Wayanad voters for Lok Sabha victory

വയനാട് ലോക്സഭാ മണ്ഡലത്തിൽ നിന്ന് വമ്പിച്ച വിജയം നേടിയതിന് പിന്നാലെ, പ്രിയങ്ക ഗാന്ധി വോട്ടർമാർക്കും പാർട്ടി പ്രവർത്തകർക്കും നന്ദി അറിയിച്ചു. സോഷ്യൽ മീഡിയയിൽ പോസ്റ്റ് ചെയ്ത കുറിപ്പിൽ, വയനാട്ടിലെ ജനങ്ങൾ തന്നിൽ അർപ്പിച്ച വിശ്വാസത്തിന് നന്ദി പറയുകയും ഈ വിജയം അവരുടേത് കൂടിയാണെന്ന് ഉറപ്പാക്കുമെന്ന് പ്രതിജ്ഞയെടുക്കുകയും ചെയ്തു. പാർലമെന്റിൽ വയനാടിന്റെ ശബ്ദമാകുമെന്നും അവർ ഉറപ്പുനൽകി.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

യുഡിഎഫിലെ സഹപ്രവർത്തകർ, കേരളത്തിലെ നേതാക്കൾ, പ്രവർത്തകർ എന്നിവരോടുള്ള നന്ദി പ്രിയങ്ക പ്രകടിപ്പിച്ചു. തന്റെ പ്രചാരണത്തിനായി 12 മണിക്കൂറോളം ഊണും ഉറക്കവുമുപേക്ഷിച്ച് പ്രവർത്തിച്ചവരെ അവർ പ്രത്യേകം അഭിനന്ദിച്ചു. കുടുംബത്തിന്റെ പിന്തുണയ്ക്കും അവർ നന്ദി പറഞ്ഞു. പ്രത്യേകിച്ച് സഹോദരൻ രാഹുലിന്റെ പിന്തുണ തനിക്ക് എല്ലായ്പ്പോഴും കരുത്തുപകർന്നതായി അവർ പറഞ്ഞു.

വിജയത്തിന് പിന്നാലെ പ്രിയങ്ക ഗാന്ധി കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിലെത്തി. ഖാർഗെയുടെ വീടിന് മുന്നിൽ ആഘോഷ പ്രകടനങ്ങളും നടന്നു. പ്രിയങ്കയുടെ ഭർത്താവ് റോബർട്ട് വാദ്ര മാധ്യമങ്ങളോട് സംസാരിച്ചു. വയനാട് ജനതയോട് നന്ദി അറിയിക്കുന്നുവെന്നും പ്രിയങ്ക നൽകിയ വാഗ്ദാനങ്ങൾ എല്ലാം നിറവേറ്റുമെന്നും അദ്ദേഹം പറഞ്ഞു. വയനാട് ജനതയുടെ പ്രശ്നങ്ങൾ പ്രിയങ്ക പാർലമെന്റിൽ ഉയർത്തിക്കാട്ടുമെന്നും അദ്ദേഹം ഉറപ്പുനൽകി.