K C Venugopal accuses CM of insulting Panakkad Thangal

മുഖ്യമന്ത്രി പിണറായി വിജയൻ പാണക്കാട് സാദിഖലി തങ്ങളെ അധിക്ഷേപിച്ചുവെന്ന് കോൺഗ്രസ് നേതാവ് കെ സി വേണുഗോപാൽ ആരോപിച്ചു. മുനമ്പം വിഷയത്തിൽ പാണക്കാട് തങ്ങളെ അഭിനന്ദിക്കുമെന്നാണ് കരുതിയതെന്നും, എന്നാൽ മുഖ്യമന്ത്രി നിന്ദ്യമായ ഭാഷയിലാണ് തങ്ങളെ വിമർശിച്ചതെന്നും അദ്ദേഹം പറഞ്ഞു. ഇത് ബോധപൂർവം ചെയ്യുന്നതാണെന്നും, ബിജെപിയുടെ വർഗീയതയെ ഫണം വിരിച്ച് ആടാൻ അനുവദിക്കുകയാണെന്നും അദ്ദേഹം ആരോപിച്ചു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

മുനമ്പം വിഷയം വഷളാക്കിയത് സർക്കാരാണെന്ന് കെ സി വേണുഗോപാൽ കുറ്റപ്പെടുത്തി. സർക്കാരിന് നേരത്തെ പ്രശ്നം പരിഹരിക്കാൻ ആകുമായിരുന്നുവെന്നും, ഇപ്പോഴത്തെ ചർച്ച നേരത്തെ നടത്തേണ്ടതായിരുന്നുവെന്നും അദ്ദേഹം ചൂണ്ടിക്കാട്ടി. ഇപ്പോൾ പാണക്കാട് തങ്ങളെ അധിക്ഷേപിക്കുന്നത് ബിജെപിയെ സഹായിക്കാനാണെന്നും അദ്ദേഹം ആരോപിച്ചു.

സന്ദീപ് വാര്യരെ പാർട്ടിയിലെടുത്തത് എഐസിസിയുടെ അനുമതിയോടെയാണെന്ന് കെ സി വേണുഗോപാൽ വ്യക്തമാക്കി. സന്ദീപ് വാര്യരുടെ പശ്ചാത്തലം ഇനി പ്രസക്തമല്ലെന്നും, അദ്ദേഹം പഴയ പ്രത്യയശാസ്ത്രം ഉപേക്ഷിച്ചു കഴിഞ്ഞുവെന്നും അദ്ദേഹം പറഞ്ഞു. എസ്ഡിപിഐ പിന്തുണ ആവശ്യപ്പെട്ടിട്ടില്ലെന്നും, തെരഞ്ഞെടുപ്പിൽ ആരുടെയും വോട്ട് വേണ്ടെന്ന് പറയാൻ ആകില്ലെന്നും അദ്ദേഹം കൂട്ടിച്ചേർത്തു. സിപിഎംകാർ വോട്ട് ചെയ്താലും വേണ്ടെന്നു പറയില്ലെന്നും കെ.സി വേണുഗോപാൽ വ്യക്തമാക്കി.