ബിജെപിയുമായി ഇടഞ്ഞ സന്ദീപ് വാര്യർ കോൺഗ്രസിലേക്ക് ചേക്കേറുന്നതായി റിപ്പോർട്ട്. പ്രതിപക്ഷ നേതാവ് വി.ഡി. സതീശനുമായി സന്ദീപ് വാര്യർ കൂടിക്കാഴ്ച നടത്തിയതായി അറിയുന്നു. കോൺഗ്രസിലെ മുതിർന്ന നേതാക്കളായ കെ. സുധാകരനും വി.ഡി. സതീശനും പാലക്കാട് ചർച്ച നടത്തുന്നുണ്ട്. വാർത്താ സമ്മേളനം ഉടൻ വിളിച്ചേക്കുമെന്നും സൂചനയുണ്ട്.
എന്നാൽ, സന്ദീപ് വാര്യർക്കെതിരെ മേജർ രവി രംഗത്തെത്തി. തെരഞ്ഞെടുപ്പ് കാലത്ത് പാർട്ടിക്കുള്ളിലെ വിയോജിപ്പ് തുറന്നുപറയാൻ പാടില്ലായിരുന്നുവെന്ന് മേജർ രവി ട്വന്റിഫോറിനോട് പറഞ്ഞു. കേഡർ പാർട്ടി സ്വഭാവം മനസിലാക്കേണ്ടതായിരുന്നുവെന്നും അദ്ദേഹം കൂട്ടിച്ചേർത്തു.
അഭിപ്രായം തുറന്നുപറയേണ്ട ഘട്ടം മറ്റൊന്നായിരുന്നുവെന്നും സന്ദീപിനോട് വ്യക്തിപരമായി സംസാരിച്ച് ഇക്കാര്യം പറഞ്ഞിരുന്നുവെന്നും മേജർ രവി വ്യക്തമാക്കി. പാർട്ടിയിലേക്ക് മടങ്ങി വരാൻ സന്ദീപ് എവിടേയും പോയിട്ടില്ലെന്നും സന്ദീപ് വാര്യരുമായുള്ള പ്രശ്നങ്ങൾ പാർട്ടി പരിഹരിച്ചുവരികയാണെന്നും അദ്ദേഹം കൂട്ടിച്ചേർത്തു.
Story Highlights: BJP leader Sandeep Warrier likely to join Congress after meeting with opposition leader VD Satheesan
