ചെന്നൈയിലെ കലൈഞ്ജർ സെൻ്റിനറി സൂപ്പർ സ്പെഷ്യാലിറ്റി ഹോസ്പിറ്റലിൽ ഡോക്ടറെ ആക്രമിച്ച യുവാവിനെ പ്രതിരോധിച്ച് അമ്മ രംഗത്തെത്തി. കഴിഞ്ഞ ബുധനാഴ്ച വിഘ്‌നേഷ് എന്ന യുവാവ് ആശുപത്രിയിലെത്തി ഡോക്ടർ ബാലാജിയെ ആക്രമിച്ചു. എന്നാൽ തനിക്ക് കൃത്യമായ ചികിത്സ നൽകാത്തതിനാലാണ് മകൻ ഡോക്ടറെ ആക്രമിച്ചതെന്ന് അമ്മ വാദിക്കുന്നു.
വിഘ്‌നേഷിന്റെ അമ്മ കാൻസർ രോഗിയാണ്. ഡോക്ടർ തന്നെ അവഗണിച്ചുവെന്നും, സ്റ്റേജ് 2 കാൻസറാണെന്നാണ് തന്നോട് പറഞ്ഞതെന്നും അമ്മ ആരോപിക്കുന്നു. “എനിക്ക് മറ്റൊരു കീമോതെറാപ്പി സെഷൻ ആവശ്യമില്ലെന്ന് ഡോ. ബാലാജി പറഞ്ഞു, ഞാൻ അവൻ്റെ ശത്രുവായിരുന്നോ?” എന്ന് അമ്മ ചോദിക്കുന്നു. ആക്രമണത്തിൽ ഗുരുതരമായി പരിക്കേറ്റ ഡോക്ടർ ബാലാജി ഇപ്പോൾ ചികിത്സയിലാണ്.
സംഭവത്തിൽ തമിഴ്‌നാട് മുഖ്യമന്ത്രി എംകെ സ്റ്റാലിൻ സമഗ്രമായ അന്വേഷണത്തിന് ഉത്തരവിട്ടു. ഡോക്ടറെ കുത്തി പരുക്കേൽപ്പിച്ച ശേഷം വിഘ്‌നേഷ് അലക്ഷ്യമായി ആശുപത്രിയിലൂടെ നടന്നു പോകുന്ന സിസിടിവി ദൃശ്യങ്ങൾ പുറത്തുവന്നിരുന്നു. പൊലീസ് പ്രതിയെ പിന്നീട് അറസ്റ്റ് ചെയ്ത് 15 ദിവസത്തേക്ക് ജുഡീഷ്യൽ കസ്റ്റഡിയിൽ വിട്ടു.
Story Highlights: Doctor attacked in Chennai hospital, mother defends son citing inadequate cancer treatment
