കാനഡ സർക്കാർ വിദേശ വിദ്യാർഥികൾക്കുള്ള സ്റ്റുഡന്റ് ഡയറക്റ്റ് സ്ട്രീം (എസ്‌ഡിഎസ്) വിസ പ്രോഗ്രാം വെള്ളിയാഴ്ച മുതൽ നിർത്തിവച്ചു. 2018-ൽ ഇന്ത്യയുൾപ്പെടെയുള്ള രാജ്യങ്ങളിൽ നിന്നുള്ള വിദ്യാർഥികളെ ലക്ഷ്യമിട്ട് നടപ്പാക്കിയ ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (ഐആർസിസി) പദ്ധതിയുടെ ഭാഗമായിരുന്നു ഇത്. ബ്രസീൽ, ചൈന, കൊളംബിയ, കോസ്റ്റാറിക്ക, മൊറോക്കോ, പാക്കിസ്ഥാൻ, പെറു, ഫിലിപ്പീൻസ്, വിയറ്റ്നാം എന്നീ രാജ്യങ്ങളിൽ നിന്നുള്ള വിദ്യാർഥികൾക്കും ഈ പദ്ധതി വഴി കാനഡയിൽ പഠിക്കാനുള്ള അവസരം ലഭിച്ചിരുന്നു.
താമസം, വിഭവശേഷി എന്നിവയുടെ പ്രതിസന്ധി പരിഹരിക്കുന്നതിനും വിദ്യാർഥികളുടെ അപകടസാധ്യത കുറയ്ക്കുന്നതിനുമാണ് ഈ തീരുമാനമെന്ന് കാനഡ സർക്കാർ അറിയിച്ചു. അപേക്ഷാ പ്രക്രിയയിൽ എല്ലാവർക്കും തുല്യവും ന്യായവുമായ പ്രവേശനം നൽകുന്നതിനും പദ്ധതി നിർത്തലാക്കുകയാണെന്നും സർക്കാർ വ്യക്തമാക്കി. നവംബർ 8ന് ഉച്ചയ്ക്ക് 2 മണി വരെ ലഭിച്ച അപേക്ഷകൾ മാത്രമേ സ്കീമിന് കീഴിൽ പ്രോസസ്സ് ചെയ്യുകയുള്ളൂ. ഇതിന് ശേഷമുള്ള എല്ലാ അപേക്ഷകളും റെഗുലർ സ്റ്റഡി പെർമിറ്റ് സ്ട്രീമിന് കീഴിലായിരിക്കും പരിഗണിക്കുക.
പ്രോഗ്രാം നിർത്തലാക്കുന്നതോടെ ഇന്ത്യയിൽ നിന്നും മറ്റ് 13 രാജ്യങ്ങളിൽ നിന്നുമുള്ള വിദ്യാർഥികൾക്ക് കൂടുതൽ ദൈർഘ്യമേറിയ വിസ നടപടിക്രമങ്ങൾ നേരിടേണ്ടി വരും. രാജ്യത്തേക്ക് അനുവദിക്കുന്ന കുടിയേറ്റക്കാരുടെ എണ്ണം കുത്തനെ കുറയ്ക്കാനുള്ള ശ്രമത്തിന്റെ ഭാഗമായാണ് കാനഡയുടെ ഈ നടപടി. ഇതോടെ വിദേശ വിദ്യാർഥികൾക്ക് കാനഡയിൽ പഠിക്കാനുള്ള അവസരങ്ങൾ കുറയുമെന്ന് വ്യക്തമാണ്.
Story Highlights: Canada suspends Student Direct Stream visa program for international students, affecting applicants from India and 13 other countries.
