മലപ്പുറം തിരൂര്‍ തലക്കടത്തൂരില്‍ നിയന്ത്രണം വിട്ട കാര്‍ ഏഴ് വയസ്സുകാരനെ ഇടിച്ചിട്ട് ഗുരുതരമായി പരിക്കേല്‍പ്പിച്ചു. രാവിലെ 9.45 ഓടെയാണ് അപകടമുണ്ടായത്. നെല്ലേരി സമീറിന്റെ മകന്‍ മുഹമ്മദ് റിക്‌സാന് (7) ആണ് പരിക്കേറ്റത്. അപകടത്തില്‍ കുട്ടി മതിലിനും കാറിനും ഇടയില്‍ കുടുങ്ങുകയായിരുന്നു. പരിക്കേറ്റ കുട്ടിയെ കോട്ടക്കല്‍ അല്‍മാസ് ഹോസ്പിറ്റലില്‍ പ്രവേശിപ്പിച്ചു.
സംഭവത്തില്‍ പൊലീസ് കേസെടുത്തു. കുട്ടിയെ കാറിടിക്കുന്നതിന്റെ ദൃശ്യങ്ങള്‍ പുറത്തുവന്നു. വീഡിയോയില്‍ കുട്ടി റോഡ് സൈഡില്‍ കൂടി നടന്നുപോകുന്നത് കാണാം. കുറച്ചുദൂരം നടന്നുക‍ഴിയുമ്പോള്‍ ഒരു കാര്‍ അമിതവേഗത്തില്‍ നിയന്ത്രണം വിട്ട് വരുന്നതും ദൃശ്യമാണ്. നിയന്ത്രണംവിട്ട കാര്‍ കുട്ടിയുടെ ദേഹത്തേക്ക് പാഞ്ഞുകയറുന്നതും വീഡിയോയിലുണ്ട്.
അപകടത്തില്‍ പരിക്കേറ്റ കുട്ടിയുടെ ആരോഗ്യനിലയെ കുറിച്ച് കൂടുതല്‍ കാര്യങ്ങള്‍ വ്യക്തമല്ല. അമിതവേഗതയും വാഹനത്തിന്റെ നിയന്ത്രണം നഷ്ടപ്പെട്ടതുമാകാം അപകടത്തിന് കാരണമെന്നാണ് പ്രാഥമിക നിഗമനം. ഈ സംഭവം റോഡ് സുരക്ഷയുടെ പ്രാധാന്യം വീണ്ടും ഓര്‍മ്മിപ്പിക്കുന്നു.
Story Highlights: Seven-year-old boy seriously injured in car accident in Malappuram, Kerala
