കേന്ദ്ര സർക്കാർ പിഎം വിദ്യാലക്ഷ്മി പദ്ധതിക്ക് തുടക്കം കുറിച്ചു. സാമ്പത്തിക പ്രതിസന്ധി നേരിടുന്ന വിദ്യാർത്ഥികൾക്ക് ഉന്നത വിദ്യാഭ്യാസം നേടാൻ സഹായകമാകുന്ന ഈ പദ്ധതി വഴി, ഗുണനിലവാരമുള്ള ഉന്നത വിദ്യാഭ്യാസ സ്ഥാപനങ്ങളിൽ (QHEI) പ്രവേശനം നേടുന്നവർക്ക് ജാമ്യമോ ഈടോ ഇല്ലാതെ ബാങ്കുകളിൽ നിന്നും ധനകാര്യ സ്ഥാപനങ്ങളിൽ നിന്നും വായ്പ ലഭ്യമാകും.
എൻഐആർഎഫ് റാങ്കിങിൽ ആദ്യ 100 സ്ഥാനങ്ങളിലുള്ള എല്ലാ ഉന്നത വിദ്യാഭ്യാസ സ്ഥാപനങ്ങളും, സർക്കാർ-സ്വകാര്യ സ്ഥാപനങ്ങളും ഈ പദ്ധതിയിൽ ഉൾപ്പെടും. 101 മുതൽ 200 വരെ സ്ഥാനങ്ങളിലെ കേന്ദ്ര-സംസ്ഥാന സർക്കാരുകൾ മേൽനോട്ടം വഹിക്കുന്ന സ്ഥാപനങ്ങളിലെ പഠനത്തിനും ഈ വായ്പ ലഭിക്കും. പരമാവധി ഏഴര ലക്ഷം രൂപയാണ് വായ്പ തുക.
വായ്പയ്ക്ക് അപേക്ഷിക്കുന്ന വിദ്യാർത്ഥികളുടെ കുടുംബ വാർഷിക വരുമാനം 8 ലക്ഷം രൂപയിൽ കവിയരുത്. മറ്റ് സർക്കാർ സ്കോളർഷിപ്പുകളോ പലിശയിളവുള്ള പദ്ധതികളുടെ ആനുകൂല്യങ്ങളോ ലഭിക്കുന്നവർക്ക് ഈ വായ്പയ്ക്ക് അർഹതയില്ല. കുടിശികയുള്ള തുകയുടെ 75 ശതമാനം ക്രെഡിറ്റ് ഗ്യാരൻ്റിക്കും വിദ്യാർത്ഥിക്ക് അർഹതയുണ്ട്. മൂന്ന് ശതമാനം വരെ പലിശയിളവും 10 ലക്ഷം വരെ മൊറട്ടോറിയം കാലയളവിൽ നൽകും. പിഎം വിദ്യാലക്ഷ്മി എന്ന പേരിൽ പ്രത്യേക വെബ്സൈറ്റ് വഴി വിദ്യാർത്ഥികൾക്ക് അപേക്ഷിക്കാം.
Story Highlights: PM Vidyalaxmi scheme launched for collateral-free student loans up to 7.5 lakhs for higher education
