അന്യഗ്രഹ ജീവികളെ കുറിച്ചുള്ള പഠനങ്ങളിൽ പുതിയ സാധ്യതകൾ തെളിയുന്നു. ഗ്രഹത്തിലല്ലാതെയും അന്യഗ്രഹജീവൻ സാധ്യമാണെന്ന് ശാസ്ത്രജ്ഞർ കണ്ടെത്തിയിരിക്കുന്നു. ഇതുവരെയുള്ള അന്യഗ്രഹ ജീവൻ സംബന്ധിച്ച ധാരണകളെ ചോദ്യം ചെയ്യുന്ന പഠനം അസ്‌ട്രോബയോളജി ജേണലിൽ പ്രസിദ്ധീകരിച്ചു. ജീവന് അനുയോജ്യമെന്ന് നമ്മൾ കരുതുന്ന സാഹചര്യങ്ങളുള്ള ഗ്രഹങ്ങളില്ലെങ്കിൽ പോലും ജീവൻ സാധ്യമാണെന്നാണ് പുതിയ പഠനം പറയുന്നത്.
ഗ്രഹത്തിനു പുറത്ത് ജീവൻ സാധ്യമാണെന്നതിന്റെ തെളിവായി രാജ്യാന്തര ബഹിരാകാശ നിലയത്തെ ഉദാഹരിക്കാം. എന്നാൽ അവിടെയുള്ള മനുഷ്യർക്കും മറ്റു സംവിധാനങ്ങൾക്കും വേണ്ടി ഭൂമിയിൽ നിന്നും വലിയ തോതിലുള്ള പിന്തുണയുണ്ട്. ലളിത ജീവജാലങ്ങളായ സൂക്ഷ്മജീവികൾക്ക് പരിമിത വിഭവങ്ങളാൽ പിടിച്ചു നിൽക്കാനും സാധിക്കും. പ്രത്യേകിച്ച് ഹിമാലയം മുതൽ കടലിന്റെ അടിത്തട്ടിൽ വരെ കാണപ്പെടുന്ന ടാർഡിഗ്രേഡുകളെ പോലുള്ള സൂക്ഷ്മ ജീവികൾക്ക്.
ബഹിരാകാശത്ത് ജീവജാലങ്ങൾക്ക് സമൂഹമായി അതിജീവിക്കണമെങ്കിൽ നിരവധി വെല്ലുവിളികളെ മറികടക്കേണ്ടതുണ്ട്. മർദ വ്യത്യാസം, ഊഷ്മാവ് നിലനിർത്തൽ, ശൂന്യാകാശത്തെ ഭാരമില്ലായ്മ എന്നിവയാണ് പ്രധാന വെല്ലുവിളികൾ. ഇവ മറികടക്കാനുള്ള സാങ്കേതിക വിദ്യകൾ വികസിപ്പിക്കാനാവുമെന്നാണ് ഗവേഷകർ കരുതുന്നത്. 100 മീറ്റർ വിസ്തൃതിയിൽ ജൈവ കോളനികൾ സ്ഥാപിക്കുന്നത് പ്രായോഗികമാണെന്നും പഠനം ചൂണ്ടിക്കാണിക്കുന്നു. ഭാവിയിൽ ബയോ എൻജിനീയറിങ്ങിലൂടെ നിർമിച്ച വസ്തുക്കൾ ഉപയോഗിച്ച് സുസ്ഥിരമായ അന്യഗ്രഹകോളനികൾ നിർമിക്കാനുള്ള സാധ്യത കൂടിയാണ് ഈ പഠനം മുന്നോട്ടുവെക്കുന്നത്.
Story Highlights: Scientists suggest possibility of alien life beyond planets, opening new avenues for space colonization
