ജമ്മു കാശ്‌മീരിലെ ശ്രീനഗറിൽ ഞായറാഴ്ച ഉണ്ടായ ഗ്രനേഡ് ആക്രമണത്തിൽ 10 പേർക്ക് പരുക്കേറ്റു. ടൂറിസം ഓഫീസിന് സമീപമുള്ള ചന്തയിലാണ് ആക്രമണം നടന്നത്. വലിയ തിരക്കുണ്ടായിരുന്ന സമയത്ത് സുരക്ഷാ സേനയുടെ വാഹനത്തെ ലക്ഷ്യമിട്ടാണ് ഭീകരർ ആക്രമണം നടത്തിയത്. പരുക്കേറ്റവരെ ആശുപത്രിയിലേക്ക് മാറ്റി.
ഇന്നലെ ശ്രീനഗറിൽ ഭീകരരും സുരക്ഷാ സേനയും തമ്മിൽ ഏറ്റുമുട്ടൽ നടന്നിരുന്നു. ബന്ദിപ്പോരയിലെയും ശ്രീനഗറിലെ ഖാൻയാറിലെയും വനമേഖലയിൽ ഉണ്ടായ ഏറ്റുമുട്ടലിൽ രണ്ട് പേരെ സൈന്യം വധിച്ചതായി റിപ്പോർട്ടുകളുണ്ട്.
കഴിഞ്ഞദിവസം ബദ്ഗാമിൽ അതിഥി തൊഴിലാളികൾക്ക് നേരെയും ഭീകരർ വെടിയുതിർത്തിരുന്നു. ഉത്തർപ്രദേശ് സ്വദേശികളായ സോഫിയാൻ, ഉസ്മാൻ മാലിക് എന്നിവർക്കാണ് വെടിയേറ്റത്. കശ്മീർ താഴ്വരയിൽ രണ്ടാഴ്ചയ്ക്കിടെ അതിഥിത്തൊഴിലാളികൾക്കു നേരെയുണ്ടാകുന്ന നാലാമത്തെ ഭീകരാക്രമണമാണിത്.
Story Highlights: Grenade attack near J&K tourism office in Srinagar, 10 injured
