തിരുവനന്തപുരത്തെ വാമനപുരം പാർക്ക് ജംഗ്ഷനിൽ മുഖ്യമന്ത്രി പിണറായി വിജയന്റെ എസ്കോർട്ട് വാഹനങ്ങൾ അപകടത്തിൽപ്പെട്ടു. വലതുവശത്തേക്ക് തിരിഞ്ഞ സ്കൂട്ടർ യാത്രക്കാരിയെ രക്ഷിക്കാൻ ശ്രമിക്കുന്നതിനിടെയാണ് അഞ്ച് എസ്കോർട്ട് വാഹനങ്ങൾ കൂട്ടിയിടിച്ചത്. മുഖ്യമന്ത്രിയുടെ വാഹനത്തിന്റെ പുറകിലും ഇടിച്ചെങ്കിലും അപകടത്തിൽ ആർക്കും പരുക്കേറ്റിട്ടില്ല.
കോട്ടയത്ത് നിന്ന് തിരുവനന്തപുരത്തേക്കുള്ള യാത്രക്കിടെയാണ് അപകടമുണ്ടായത്. എസ്കോർട്ട് വാഹനം കണ്ട് ഭയന്ന് ഇരുചക്ര വാഹന യാത്രക്കാരി പേടിച്ച് മാറിയതോടെ, മുഖ്യമന്ത്രിയുടെ എസ്കോർട്ട് വാഹനം ബ്രേക്ക് ചെയ്തു. തൊട്ടു പിറകെ ഉണ്ടായിരുന്ന വാഹനങ്ങളും പെട്ടെന്ന് നിർത്തി. ഇതിന് പിന്നാലെ വന്ന ആംബുലൻസ് മുഖ്യമന്ത്രിയുടെ എസ്കോർട്ട് വാഹനത്തിൽ ഇടിക്കുകയുമായിരുന്നു.
അപകടത്തിന്റെ സിസിടിവി ദൃശ്യങ്ങൾ ട്വന്റിഫോറിന് ലഭിച്ചിട്ടുണ്ട്. ഈ ദൃശ്യങ്ങളിൽ മുഖ്യമന്ത്രിയുടെ അകമ്പടി വാഹനങ്ങൾ നിരനിരയായി കൂട്ടിയിടിക്കുന്നത് കാണാം. അപകടത്തിൽ ആർക്കും ഗുരുതരമായ പരുക്കുകൾ ഏറ്റിട്ടില്ലെന്നത് ആശ്വാസകരമാണ്.
Story Highlights: Chief Minister Pinarayi Vijayan’s escort vehicles involved in accident in Thiruvananthapuram, no injuries reported
