കൊച്ചിയിലെ കൂട്ട മൊബൈൽ ഫോൺ മോഷണക്കേസിൽ പുതിയ വഴിത്തിരിവ്. മോഷ്ടിച്ച മൊബൈൽ ഫോണുകൾ ദില്ലിയിലെ ചോർ ബസാറിൽ എത്തിയതായി കണ്ടെത്തി. മൂന്ന് ഐഫോണുകളുടെ ലൊക്കേഷൻ ചോർ ബസാറിൽ നിന്നാണെന്ന് അന്വേഷണ സംഘം വ്യക്തമാക്കി. മോഷണ സംഘം ഫോണുകൾ വിൽക്കാനുള്ള നീക്കത്തിലാണെന്നും സൂചന ലഭിച്ചു.
എറണാകുളത്ത് അലൻ വാക്കറുടെ ഡിജെ പാർട്ടിക്കിടെയാണ് കൂട്ട മൊബൈൽ മോഷണം നടന്നത്. മൊബൈൽ ഫോൺ ലൊക്കേഷനുകൾ കേന്ദ്രീകരിച്ചാണ് അന്വേഷണ സംഘം അന്വേഷണം നടത്തിയത്. ഉത്തരേന്ത്യ കേന്ദ്രീകരിച്ച് പ്രവ‍ർത്തിക്കുന്ന അസ്‌ലം ഖാൻ്റെ നേതൃത്വത്തിലുള്ള സംഘത്തിൻ്റെ പ്രവർത്തനത്തിന് സമാനമായ പ്രവ‍ർത്തന രീതിയെന്നാണ് അന്വേഷണ സംഘം വിലയിരുത്തിയത്.
മോഷണത്തിന് പിന്നിൽ ഡൽഹിയിലെ അസ്‌ലം ഖാൻ സംഘം തന്നെയെന്ന് സൂചന ലഭിച്ചതിനെ തുടർന്ന്, മോഷ്ടാക്കളെ തേടി കൊച്ചിയിലെ പൊലീസ് സംഘം ദില്ലിയിൽ എത്തി. കേസിൽ കൂടുതൽ വിവരങ്ങൾ ലഭിക്കുമെന്ന് പ്രതീക്ഷിക്കുന്നു.
Story Highlights: Stolen mobile phones from Kochi found in Delhi’s Chor Bazaar, police team reaches Delhi to investigate
