റിസർവ് ബാങ്ക് ഓഫ് ഇന്ത്യ (ആർബിഐ) തുടർച്ചയായ പത്താം തവണയും റിപ്പോ നിരക്ക് 6.5 ശതമാനത്തിൽ നിലനിർത്തി. ആർബിഐയുടെ പണനയ യോഗമാണ് ഈ തീരുമാനമെടുത്തത്. രാജ്യത്തെ വ്യവസായ ലോകവും സാധാരണക്കാരും ഏറെ പ്രതീക്ഷയോടെയാണ് ഈ മാസം ഏഴിന് മുംബൈയിൽ ചേർന്ന മോണിറ്ററി പോളിസി കമ്മിറ്റി യോഗത്തെ നോക്കിക്കണ്ടത്. എന്നാൽ, ആഗോള-ആഭ്യന്തര സാഹചര്യങ്ങൾ വിശകലനം ചെയ്ത ആറംഗ കമ്മിറ്റി നിരക്കിളവിന് സമയമായില്ലെന്ന നിഗമനത്തിലെത്തി.
ചില്ലറ വില സൂചിക അടിസ്ഥാനമാക്കിയുള്ള പണപ്പെരുപ്പം ഉയരാനുള്ള സാധ്യത കണക്കിലെടുത്താണ് തൽക്കാലം പലിശ കുറയ്ക്കേണ്ടെന്ന നിലപാടിലേക്ക് ആർബിഐ എത്തിയത്. കാലം തെറ്റിയെത്തിയ മഴ വിള കുറച്ചതും ഭക്ഷ്യ വിലക്കയറ്റം കൂടിയതും നിരക്കിളവിലേക്ക് കടക്കുന്നതിൽ നിന്ന് ധനനയക്കമ്മിറ്റിയെ വിലക്കി. പശ്ചിമേഷ്യയിലെ യുദ്ധഭീതി നിലനിൽക്കുന്നതും വിവിധ മേഖലകളിൽ സാമ്പത്തിക രംഗത്തെ ബാധിച്ചേക്കുമെന്ന് കമ്മിറ്റി കണക്കുകൂട്ടുന്നു.
സെപ്റ്റംബറിൽ യുഎസ് ഫെഡറൽ റിസർവ് അര ശതമാനം നിരക്കിളവിന് തയ്യാറായതോടെ ആർബിഐയും സമാന നിലപാട് സ്വീകരിച്ച് പലിശ നിരക്ക് കുറച്ചേക്കുമെന്നായിരുന്നു പൊതു വിലയിരുത്തൽ. എന്നാൽ, സെപ്റ്റംബറിലെ വിലക്കയറ്റം കൂടിയേക്കുമെന്ന് കമ്മിറ്റി കണക്കുകൂട്ടുന്നു. അതേസമയം, 2025 ലെ ജിഡിപി നിരക്ക് പ്രവചനം 7.2 ശതമാനത്തിൽ നിലനിർത്താൻ തയ്യാറായത് വളർച്ചയിൽ കമ്മിറ്റിക്ക് ആശങ്കയില്ലെന്ന് വ്യക്തമാക്കുന്നു.
Story Highlights: RBI maintains repo rate at 6.5% for the tenth consecutive time
