ഇസ്രയേലിനെതിരെ മിസൈൽ ആക്രമണത്തിന് ഇറാൻ തയ്യാറെടുക്കുന്നതായി അമേരിക്ക മുന്നറിയിപ്പ് നൽകി. ഈ സാഹചര്യത്തിൽ, ഇസ്രയേലിനെ പ്രതിരോധിക്കുവാനുള്ള നടപടികൾ ആരംഭിച്ചതായി വൈറ്റ് ഹൗസ് അറിയിച്ചു. ഇസ്രയേലിനെതിരെ നേരിട്ട് നടത്തുന്ന ഏതൊരു ആക്രമണവും ഇറാന് ഗുരുതരമായ പ്രത്യാഘാതങ്ങൾ ഉണ്ടാക്കുമെന്നും വൈറ്റ് ഹൗസ് മുന്നറിയിപ്പ് നൽകി.
തെക്കൻ ലെബനനിലേക്ക് ഇസ്രയേൽ കരയുദ്ധം ആരംഭിച്ചതിന് പിന്നാലെയാണ് ബാലിസ്റ്റിക് മിസൈൽ ആക്രമണത്തിന് ഇറാൻ തയാറെടുക്കുന്നതായി സൂചന വന്നത്. ഇറാൻ്റെ പിന്തുണയുള്ള തീവ്രവാദ ഗ്രൂപ്പായ ഹിസ്ബുള്ളയ്‌ക്കെതിരായ ആക്രമണത്തിൻ്റെ ഭാഗമായാണ് ഇസ്രയേൽ കരസേന തെക്കൻ ലെബനനിലേക്ക് കടന്നത്. എന്നാൽ, ലെബനനിൽ ഹിസ്ബുല്ല കേന്ദ്രങ്ങൾ മാത്രം ലക്ഷ്യമിട്ടുള്ള ‘പരിമിതമായ’ ആക്രമണമാണ് നടത്തുകയെന്ന് ഇസ്രയേൽ പ്രതിരോധ സേന വ്യക്തമാക്കിയിരുന്നു.
ഇറാൻ തിരിച്ചടിക്കുമെന്ന വിലയിരുത്തലിനെ തുടർന്ന് അമേരിക്കൻ സൈനികർ പശ്ചിമേഷ്യയിൽ എത്തുമെന്ന് പെന്റഗൺ അറിയിച്ചു. ആക്രമണത്തെ പ്രതിരോധിക്കാനുള്ള ഇസ്രയേലിന്റെ പ്രതിരോധ തയ്യാറെടുപ്പുകളെ പിന്തുണയ്ക്കുമെന്നും വൈറ്റ് ഹൗസ് വ്യക്തമാക്കി. ഈ സംഭവവികാസങ്ങൾ മേഖലയിലെ സംഘർഷം വർദ്ധിപ്പിക്കുമെന്ന ആശങ്ക ഉയർത്തുന്നു.
Story Highlights: Iran preparing for imminent missile attack on Israel, US warns and takes defensive measures
