തൃശൂര്‍ പൂരം വിവാദത്തിന് പിന്നാലെ മന്ത്രി കെ രാജനെ ആക്രമിക്കാന്‍ ശ്രമം നടന്നെന്ന ഗുരുതര ആരോപണവുമായി മുന്‍ മന്ത്രി വി എസ് സുനില്‍ കുമാര്‍ രംഗത്തെത്തി. ആര്‍എസ്എസ്, ബിജെപി പ്രവര്‍ത്തകരാണ് മന്ത്രിയെ ലക്ഷ്യമിട്ടതെന്ന് സുനില്‍ കുമാര്‍ വെളിപ്പെടുത്തി. തൃശ്ശൂര്‍ കളക്ടറായിരുന്ന കൃഷ്ണതേജ ഈ വിവരം മന്ത്രി കെ രാജനെ അറിയിച്ചതായും അദ്ദേഹം പറഞ്ഞു.
സര്‍ക്കാരിനെതിരെ സംഘര്‍ഷം സൃഷ്ടിക്കാനായി ലോ ആന്‍ഡ് ഓര്‍ഡര്‍ പ്രശ്‌നമുണ്ടാക്കാന്‍ ശ്രമമുണ്ടെന്നാണ് കളക്ടര്‍ മന്ത്രിയെ അറിയിച്ചതെന്ന് സുനില്‍ കുമാര്‍ വ്യക്തമാക്കി. കളക്ടറുടെ നിര്‍ദ്ദേശപ്രകാരമാണ് ആദ്യഘട്ടത്തില്‍ മന്ത്രി സംഭവസ്ഥലത്തേക്ക് എത്താതിരുന്നത്. എന്നാല്‍ പിന്നീട് രണ്ടും കല്‍പ്പിച്ചാണ് താനും മന്ത്രിയും ശ്രീമൂല സ്ഥാനത്ത് എത്തിയതെന്നും അദ്ദേഹം കൂട്ടിച്ചേര്‍ത്തു.
മന്ത്രി രാജനടക്കം വീട്ടില്‍ പോയി ഇരുന്നുവെന്ന ആരോപണം തെറ്റാണെന്ന് സുനില്‍ കുമാര്‍ വിശദീകരിച്ചു. സുരക്ഷാ ഭീഷണി കാരണമാണ് ആദ്യഘട്ടത്തില്‍ മാറിനിന്നതെന്നും, തങ്ങളെല്ലാവരും അവിടെയുണ്ടായിരുന്നുവെന്നും അദ്ദേഹം പറഞ്ഞു. ജനങ്ങള്‍ ഇക്കാര്യങ്ങളെല്ലാം അറിയണമെന്നും സുനില്‍ കുമാര്‍ അഭിപ്രായപ്പെട്ടു.
Story Highlights: Former minister V S Sunil Kumar alleges attempt to attack Minister K Rajan following Thrissur Pooram controversy
