സിപിഐഎം പൊളിറ്റ് ബ്യൂറോ അംഗം എ വിജയരാഘവൻ പി വി അൻവറിനെ രൂക്ഷമായി വിമർശിച്ചു. മുഖ്യമന്ത്രി കാര്യങ്ങൾ വ്യക്തമാക്കിയിട്ടും അൻവർ വീണ്ടും പ്രതികരിച്ചത് ദോഷകരമാണെന്ന് വിജയരാഘവൻ അഭിപ്രായപ്പെട്ടു. ഇത്തരം പരസ്യ പ്രകടനങ്ങൾ അൻവറിന് ഗുണത്തേക്കാളേറെ ദോഷം ചെയ്യുമെന്നും അദ്ദേഹം മുന്നറിയിപ്പ് നൽകി.
സർക്കാർ ജനങ്ങൾക്ക് വേണ്ടിയുള്ള കാര്യങ്ങളുമായി മുന്നോട്ടു പോവുകയാണെന്നും, അതിനെ ദുർബലപ്പെടുത്താൻ ശ്രമിക്കുന്നത് പ്രതിപക്ഷവും ഇടതുവിരുദ്ധ നിലപാടുള്ളവരുമാണെന്നും വിജയരാഘവൻ ചൂണ്ടിക്കാട്ടി. അൻവറിന്റെ സമീപനം അത്തരത്തിലുള്ളതാണെന്നും, സമീപകാലങ്ങളിൽ അദ്ദേഹം നടത്തിയ പ്രതികരണങ്ങൾ ശത്രുക്കൾക്ക് ആഹ്ലാദിക്കാവുന്നവയാണെന്നും അദ്ദേഹം കുറ്റപ്പെടുത്തി.
അൻവർ ഉയർത്തിയ കാര്യങ്ങളിൽ നിയമാനുസൃതമായ നിലപാടുകൾ സർക്കാർ സ്വീകരിച്ചിട്ടും വീണ്ടും പ്രതികരണങ്ങളുമായി മുന്നോട്ടു വരുന്നത് ശരിയല്ലെന്ന് വിജയരാഘവൻ അഭിപ്രായപ്പെട്ടു. ഇടതുപക്ഷ എംഎൽഎ എന്ന നിലയിൽ അൻവർ നിരന്തരമായി ഇത്തരം പ്രസ്ഥാവനകള്‍ നടത്തുന്നത് ഇടതുപക്ഷത്തിന്റെ പൊതു മുന്നേറ്റത്തെ ദുർബലപ്പെടുത്തുമെന്നും അദ്ദേഹം മുന്നറിയിപ്പ് നൽകി.
Story Highlights: CPI(M) Politburo member A Vijayaraghavan criticizes P V Anwar for his public statements against the government
