പി വി അൻവറിന്റെ പ്രസ്താവനകളിൽ പലതും സത്യമാണെന്ന് മുസ്ലീം ലീഗ് നിലമ്പൂർ മണ്ഡലം പ്രസിഡന്റ് ഇക്ബാൽ മുണ്ടേരി അഭിപ്രായപ്പെട്ടു. നിലവിലെ ഭരണം സംഘപരിവാറിന് അനുകൂലമാണെന്നും, മുഖ്യമന്ത്രിയുടെ ഓഫീസ് അഴിമതിയുടെ കേന്ദ്രമായി മാറിയെന്നും അദ്ദേഹം കുറ്റപ്പെടുത്തി. സ്വാതന്ത്ര്യ സമര സേനാനിയായ ഷൗക്കത്തലി സാഹിബിന്റെ മകനായ പി.വി.അൻവറിന്റെ യഥാർത്ഥ മുഖം പിണറായി ഇനിയാണ് കാണേണ്ടതെന്നും അദ്ദേഹം പറഞ്ഞു.
മുസ്ലിം ലീഗും യു.ഡി.എഫും വർഷങ്ങളായി പറഞ്ഞുകൊണ്ടിരിക്കുന്ന നിലപാടുകളാണ് സത്യമെന്ന് തിരിച്ചറിഞ്ഞ്, പഴയ കോൺഗ്രസുകാരനായ അൻവർ അവരുടെ കൂടെ നിൽക്കാൻ തയ്യാറാകുന്ന ഘട്ടം വരുമെന്ന് ഇക്ബാൽ മുണ്ടേരി പ്രതീക്ഷ പ്രകടിപ്പിച്ചു. നാടിന്റെ നന്മയ്ക്കായി ദുഷ്ടശക്തികൾക്കെതിരെ ഒരുമിച്ച് പോരാടാമെന്ന് അദ്ദേഹം പി.വി.അൻവറിനോട് ആഹ്വാനം ചെയ്തു.
ഫേസ്ബുക്ക് പോസ്റ്റിലൂടെയാണ് ഇക്ബാൽ മുണ്ടേരി തന്റെ നിലപാട് പ്രകടിപ്പിച്ചത്. എന്നാൽ, ഈ പ്രസ്താവന വാർത്തയായതിനു പിന്നാലെ അദ്ദേഹം പോസ്റ്റ് ഡിലീറ്റ് ചെയ്തു. ഇക്ബാൽ മുണ്ടേരിയുടെ പ്രസ്താവന വലിയ ചർച്ചയ്ക്ക് വഴിവെച്ചിരുന്നു.
Story Highlights: Muslim League leader Iqbal Munderi supports PV Anwar’s statements, criticizes current government
