ഗുരുതര ആരോപണങ്ങൾ നേരിടുന്ന എഡിജിപി എംആർ അജിത് കുമാറിനെതിരെ സർക്കാർ എന്ത് നടപടിയെടുക്കുമെന്നതിൽ ഇന്ന് തീരുമാനം ഉണ്ടായേക്കും. സഭാസമ്മേളനം തുടങ്ങുന്നതിനുമുൻപ്‌ അജിത്കുമാറിനെ അപ്രധാന തസ്തികയിലേക്ക് മാറ്റി എതിർപ്പ് ശമിപ്പിക്കാനാണ് സർക്കാർ ശ്രമിക്കുന്നത്. ഈ സാഹചര്യത്തിൽ മുഖ്യമന്ത്രി പിണറായി വിജയൻ ഇന്ന് രാവിലെ 11 മണിക്ക് മാധ്യമങ്ങളെ കാണും.
തൃശൂർ പൂരം വിവാദത്തിലെ അന്വേഷണറിപ്പോർട്ട് ഉടൻ കൈമാറിയേക്കും. ചെന്നൈയിലുള്ള എഡിജിപി തിരിച്ചെത്തിയാലുടൻ റിപ്പോർട്ട് ഡി.ജി.പിക്കും മുഖ്യമന്ത്രിക്കും കൈമാറും. അന്വേഷണം പ്രഖ്യാപിച്ച് അഞ്ചു മാസങ്ങൾക്ക് ശേഷമാണ് റിപ്പോർട്ട് നൽകുന്നത്. സിപിഐ സമ്മർദം ചെലുത്തുന്നതിനിടെയാണ് മുഖ്യമന്ത്രി മൗനം വെടിയുന്നത്.
എഡിജിപി എംആർ അജിത് കുമാറിന് എതിരായ ആരോപണങ്ങൾ, തൃശൂർ പൂരം വിവാദം, പി ശശിക്ക് എതിരായ പരാതി, മുന്നണിക്ക് അകത്തെ അതൃപ്തി തുടങ്ങിയ വിഷയങ്ങളിൽ അടക്കം മുഖ്യമന്ത്രി പ്രതികരിക്കുമെന്നാണ് കരുതുന്നത്. പിവി അൻവർ എംഎൽഎ ഉയർത്തിയ ആരോപണങ്ങളും തുടർന്നുള്ള വിവാദങ്ങൾക്കുമിടെയാണ് മുഖ്യമന്ത്രിയുടെ വാർത്താസമ്മേളനം നടക്കുന്നത്.
Story Highlights: Kerala government may decide today on action against ADGP MR Ajith Kumar facing serious allegations, with Chief Minister Pinarayi Vijayan expected to address media.
