എറണാകുളം ഡിസിസി പ്രസിഡന്റ് മുഹമ്മദ് ഷിയാസ് പിവി അന്‍വര്‍ എംഎല്‍എയുടെ ആരോപണങ്ങള്‍ക്ക് മറുപടി നല്‍കി. അൻവർ വീണ്ടും വ്യക്തി അധിക്ഷേപം നടത്തുകയാണെന്നും നാവിന് എല്ലില്ലാത്ത വ്യക്തിയാണെന്നും ഷിയാസ് ആരോപിച്ചു. താൻ ക്വാട്ടേഷൻ സംഘാംഗമാണെന്ന ആരോപണം ബാലിശമാണെന്നും അൻവർ ഒരുപാട് കേസുകളിലെ പ്രതിയാണെന്നും അദ്ദേഹം പറഞ്ഞു. സ്വന്തം പാർട്ടി പോലും ആരോപണങ്ങൾ പരിഗണിക്കുന്നില്ലെങ്കിൽ ആ പാർട്ടിയിൽ നിന്ന് ഇറങ്ങണമെന്നും ഷിയാസ് കൂട്ടിച്ചേർത്തു.
കോൺഗ്രസ്‌ നേതാക്കൾക്കെതിരെ ആരോപണം ഉണ്ടെങ്കിൽ അൻവർ തെളിവ് ഹാജരാക്കണമെന്ന് ഷിയാസ് ആവശ്യപ്പെട്ടു. തെളിവുണ്ടെങ്കിൽ മറുപടി നൽകാമെന്നും അദ്ദേഹം പറഞ്ഞു. അൻവറിന്റെ വിരട്ടൽ കോൺഗ്രസിനോട് വേണ്ട, മുഖ്യമന്ത്രിയോട് മതിയെന്നും ഷിയാസ് പരിഹസിച്ചു. ദുരാരോപണം നടത്തുന്നത് രാഷ്ട്രീയ നേട്ടത്തിനാണെന്നും സന്ദേശം സിനിമയിലെ കുമാരപിള്ള സഖാവിന്റെ സിൻഡ്രോം ആണ് ഇപ്പോൾ അൻവറിനെ ബാധിച്ചിരിക്കുന്നതെന്നും അദ്ദേഹം കുറ്റപ്പെടുത്തി.
പി വി അൻവർ കുരയ്ക്കുകയെ ഉള്ളൂ കടിക്കില്ലെന്നും ഷിയാസിനെ വിരട്ടാൻ അൻവർ ആളായിട്ടില്ലെന്നും മുഹമ്മദ് ഷിയാസ് പറഞ്ഞു. വനിത പ്രവർത്തകയുടെ പരാതിയിൽ കെപിസിസി അന്വേഷണം നടത്തുന്നുണ്ടെന്നും വേണമെങ്കിൽ പൊലീസിൽ പരാതി നൽകാമെന്നും കോൺഗ്രസ്‌ സഹായം നൽകുമെന്നും അദ്ദേഹം കൂട്ടിച്ചേർത്തു.
Story Highlights: Ernakulam DCC President Muhammad Shiyas responds to allegations by PV Anwar MLA, calling them baseless and politically motivated.
