കേരള രാഷ്ട്രീയത്തിലെ അയിത്തം അവസാനിപ്പിക്കണമെന്ന് ആവശ്യപ്പെട്ട് ഗോവ ഗവർണർ പി.എസ്. ശ്രീധരൻ പിള്ള എഡിജിപി-ആർഎസ്എസ് കൂടിക്കാഴ്ച വിവാദത്തെ വിമർശിച്ചു. ആർക്കും ആരെയും കാണാമെന്നും അതിന്റെ പേരിൽ നീളുന്ന രാഷ്ട്രീയ ചർച്ച ശരിയല്ലെന്നും അദ്ദേഹം ട്വന്റിഫോറിനോട് പറഞ്ഞു. ആർഎസ്എസിനെ തൊടുകൂടായ്മ പാടില്ലെന്നും ആശയപരമായി വേണം ചർച്ചകളെന്നും ഗോവ ഗവർണർ അഭിപ്രായപ്പെട്ടു.
പണ്ട് മോദി ശിവഗിരി വന്നപ്പോൾ ബഹിഷ്കരിച്ചവർ പിന്നീട് കാത്തിരുന്നു കണ്ടുവെന്ന് പി.എസ്. ശ്രീധരൻ പിള്ള ചൂണ്ടിക്കാട്ടി. എഡിജിപി എം.ആർ. അജിത് കുമാർ-ആർഎസ്എസ് കൂടിക്കാഴ്ച വലിയ രാഷ്ട്രീയ ചർച്ചകൾക്ക് കളമൊരുക്കിയിരുന്നു. 2023 മെയ് 22-ന് ആർഎസ്എസ് ജനറൽ സെക്രട്ടറി ദത്താത്രേയ ഹൊസബാലെയുമായി നടത്തിയ കൂടിക്കാഴ്ച വൻ വിവാദമായതിന് പിന്നാലെയാണ് റാം മാധവുമായി നടത്തിയ കൂടിക്കാഴ്ചയുടെ വിവരങ്ങളും പുറത്തുവന്നത്.
കോവളത്തെ സ്വകാര്യ ഹോട്ടലിൽ കഴിഞ്ഞ വർഷമാണ് എഡിജിപി എം.ആർ. അജിത്ത് കുമാർ-ആർഎസ്എസ് നേതാവ് റാം മാധവ് കൂടിക്കാഴ്ച നടന്നത്. സുഹൃത്തിന്റെ ക്ഷണപ്രകാരം നടത്തിയ സ്വകാര്യ കൂടിക്കാഴ്ചയാണെന്നാണ് ദത്താത്രേയ ഹൊസബാലെയുമായി നടത്തിയ കൂടിക്കാഴ്ചയിൽ മുഖ്യമന്ത്രിക്ക് അജിത് കുമാർ നൽകിയ വിശദീകരണം. ആർഎസ്എസ് ജനറൽ സെക്രട്ടറി ദത്താത്രേയ ഹൊസബാളെയെ അജിത് കുമാർ സന്ദർശിച്ചതിന് ഇടനിലക്കാരനായി പ്രവർത്തിച്ചതും കൈമനം ജയകുമാറാണ്.
Story Highlights: Goa Governor P.S. Sreedharan Pillai criticizes ADGP-RSS meeting controversy, calls for end to political untouchability in Kerala
