തെലുങ്ക് സംസ്ഥാനങ്ങളായ ആന്ധ്രാപ്രദേശിലും തെലങ്കാനയിലും കനത്ത മഴയെ തുടർന്നുണ്ടായ ദുരിതത്തിൽ കഴിയുന്നവരെ സഹായിക്കാനായി പ്രശസ്ത നടൻ അല്ലു അർജുൻ മുന്നോട്ട് വന്നിരിക്കുകയാണ്. ഇരു സംസ്ഥാനങ്ങളിലെയും മുഖ്യമന്ത്രിമാരുടെ ദുരിതാശ്വാസ നിധിയിലേക്ക് ആകെ ഒരു കോടി രൂപയാണ് താരം സംഭാവന നൽകിയത്.
ജീവകാരുണ്യ പ്രവർത്തനങ്ങളിൽ സജീവ പങ്കാളിത്തം വഹിക്കുന്ന വ്യക്തിയാണ് അല്ലു അർജുൻ. വെള്ളപ്പൊക്കം മൂലമുണ്ടായ ദുരിതത്തിൽ ദുഃഖം പ്രകടിപ്പിച്ച് താരം തന്നെയാണ് തന്റെ ഔദ്യോഗിക സോഷ്യൽ മീഡിയ അക്കൗണ്ടിലൂടെ സഹായം നൽകിയ വിവരം പങ്കുവെച്ചത്. വീടും വസ്തുക്കളും നഷ്ടപ്പെട്ടവരെ സഹായിക്കാനാണ് ഈ തുക നൽകിയതെന്ന് അദ്ദേഹം വ്യക്തമാക്കി.
‘ആന്ധ്രാപ്രദേശിലും തെലങ്കാനയിലും നാശം വിതച്ച മഴയിൽ ഉണ്ടായ നഷ്ടങ്ങളിലും കഷ്ടപ്പാടുകളിലും ഞാൻ ദുഃഖിതനാണ്. ഈ വെല്ലുവിളി നിറഞ്ഞ സമയങ്ങളിൽ, ദുരിതാശ്വാസ പ്രവർത്തനങ്ങൾക്ക് പിന്തുണ നൽകുന്നതിനായി രണ്ട് സംസ്ഥാനങ്ങളിലെയും മുഖ്യമന്ത്രിമാരുടെ ദുരിതാശ്വാസ നിധിയിലേക്ക് ഞാൻ വിനീതമായ് ഒരു കോടി രൂപ സംഭാവന ചെയ്യുന്നു. എല്ലാവരുടെയും സുരക്ഷക്കായ് പ്രാർത്ഥിക്കുന്നു.’ എന്നാണ് അല്ലു അർജുൻ ട്വിറ്ററിൽ കുറിച്ചത്.
Story Highlights: Allu Arjun donates 1 crore to flood-affected Telangana and Andhra Pradesh
