ഇന്ന് അത്തത്തോടെ പൊന്നോണത്തിന്റെ വരവ് അറിയിക്കുന്നു. ഇനിയുള്ള പത്തു ദിവസം മലയാളികളുടെ മനസ്സിലും മുറ്റത്തും പൂവിളിയും പൂക്കളവും നിറയും. ലോകമെമ്പാടുമുള്ള എല്ലാ മലയാളികളും ജാതി മത ഭേദമന്യേ ഓണം ആഘോഷിക്കാനൊരുങ്ങി കഴിഞ്ഞു. പുത്തനുടുപ്പും സദ്യയും ഓണക്കളികളുമായി തിരുവോണം ആഘോഷിക്കാൻ പത്തു ദിവസത്തെ കാത്തിരിപ്പാണ് ഇനി.
പഴമയുടെ വീണ്ടെടുപ്പിലേക്കുള്ള പുതു തലമുറയുടെ മടക്കയാത്ര കൂടിയാണ് ഓരോ ഓണവും. മുക്കൂറ്റിയും കാക്കപ്പൂവും തുമ്പപ്പൂവും പറമ്പുകളില്‍ ഇന്ന് കിട്ടാനില്ലെങ്കിലും, തുമ്പയും കാക്കപ്പൂവും തൊട്ടാവാടിയുമൊക്കെ എവിടെയൊക്കയോ പ്രതീക്ഷകളുണർത്തി തലപൊക്കുന്നുണ്ടാവാം. കാട്ടിലും മേട്ടിലും നടന്നു ശേഖരിച്ച പൂക്കളുടെ കാലം ഓര്‍മ്മയില്‍ ആണെങ്കിലും, സ്‌നേഹത്തിന്റെ കളങ്ങളിലേക്ക് പല വര്‍ണ്ണത്തിലുള്ള പൂക്കള്‍ ഇപ്പോഴും നിറയുന്നുണ്ട്. ചാണകം മെഴുകി പൂക്കളം ഇടുന്ന രീതി നന്നേ കുറഞ്ഞുവെങ്കിലും, പൂക്കളങ്ങളുടെ പ്രാധാന്യം കുറഞ്ഞിട്ടില്ല.
ചിങ്ങത്തിലെ അത്തം നാളില്‍ തുടങ്ങുന്ന ഓണാഘോഷം തിരുവോണം കഴിഞ്ഞ് ചതയം നാള്‍ വരെ നീണ്ടു നില്‍ക്കും. കഥകളിയും വള്ളംകളിയും ദേവരൂപങ്ങളുമെല്ലാം പൂക്കളങ്ങള്‍ക്ക് ഇനിയുള്ള നാളുകളില്‍ ഡിസൈനുകളാകും. ഓണക്കോടി വാങ്ങിയും സദ്യഒരുക്കിയും കൂട്ടായ്മയുടെയും സന്തോഷത്തിന്റെയും പത്തു നാളുകള്‍ ആണ് ഇനി മലയാളിക്ക് വരാനിരിക്കുന്നത്. ഈ ഓണക്കാലം മലയാളികൾക്ക് സന്തോഷവും ഐക്യവും നിറഞ്ഞതാകട്ടെ.
Story Highlights: Kerala begins 10-day Onam celebrations with Atham
