ലോകത്തിലെ ഏറ്റവും വലിയ ഷിപ്പിംഗ് കമ്പനിയായ MSC യുടെ കൂറ്റൻ ചരക്ക് കപ്പലായ MSC ഡെയ്‌ല ഇന്ന് വൈകുന്നേരം വിഴിഞ്ഞം തുറമുഖത്ത് നങ്കൂരമിടും. ഇതുവരെ വിഴിഞ്ഞത്ത് എത്തിയ കപ്പലുകളിൽ ഏറ്റവും വലുതാണ് ഈ മദർഷിപ്പ്. 1500 ഓളം കണ്ടെയ്‌നറുകൾ ഈ കപ്പലിൽ നിന്ന് തുറമുഖത്ത് ഇറക്കും. വൈകിട്ട് അഞ്ചോടെ കപ്പൽ വിഴിഞ്ഞത്ത് എത്തുമെന്ന് തുറമുഖ അധികൃതർ അറിയിച്ചു.
ആഫ്രിക്കൻ രാജ്യമായ ടോഗോയിൽ നിന്ന് പുറപ്പെട്ട MSC ഡെയ്‌ല, മുംബൈയിലെ നാവ ഷേവ തുറമുഖം വഴിയാണ് വിഴിഞ്ഞത്ത് എത്തുന്നത്. 13,988 കണ്ടെയ്‌നറുകൾ വഹിക്കാൻ ശേഷിയുള്ള ഈ കപ്പലിന് 366 മീറ്റർ നീളവും 51 മീറ്റർ വീതിയും ഉണ്ട്. MSC യുടെ മറ്റൊരു ഫീഡർ കപ്പലായ MSC അഡു 5, ചരക്കിറക്കാൻ മറ്റന്നാൾ വിഴിഞ്ഞത്ത് എത്തും.
വിഴിഞ്ഞം വികസനത്തിന്റെ ഭാഗമായി വിസിലും നബാർഡും തമ്മിൽ 2100 കോടിയുടെ കരാറിൽ ഒപ്പുവെച്ചു. 15 വർഷത്തേക്കാണ് ഈ കരാർ. എട്ടര ശതമാനം പലിശ നിരക്കിലാണ് ഈ തുക അനുവദിച്ചത്. ഈ വികസന പദ്ധതികൾ വിഴിഞ്ഞം തുറമുഖത്തിന്റെ പ്രാധാന്യം വർധിപ്പിക്കുകയും അന്താരാഷ്ട്ര ഷിപ്പിംഗ് രംഗത്ത് കേരളത്തിന്റെ സ്ഥാനം ഉറപ്പിക്കുകയും ചെയ്യും.
Story Highlights: MSC Deila, the largest ship to dock at Vizhinjam Port, arrives today
