കൊച്ചിയിലെ ഒരു നടിയുടെ പരാതിയിൽ നടൻ ഇടവേള ബാബുവിനെതിരെ പൊലീസ് കേസെടുത്തിരിക്കുകയാണ്. ലൈംഗികാതിക്രമ പരാതിയിൽ ഐപിസി 376 വകുപ്പ് പ്രകാരമാണ് നോർത്ത് പൊലീസ് കേസെടുത്തിരിക്കുന്നത്. താരസംഘടനയായ അമ്മയിൽ അംഗത്വം നൽകാമെന്ന് പറഞ്ഞ് ഇടവേള ബാബു ഫ്ലാറ്റിലേക്ക് വിളിച്ചുവരുത്തി ഉപദ്രവിക്കാൻ ശ്രമിച്ചെന്നായിരുന്നു നടിയുടെ പരാതി. നടി പ്രത്യേക അന്വേഷണ സംഘത്തിന് മൊഴി നൽകിയതിന് പിന്നാലെയാണ് കേസെടുത്തിരിക്കുന്നത്.
നടിയുടെ മൊഴിയുടെ അടിസ്ഥാനത്തിൽ നടന്മാരായ മുകേഷിനും ജയസൂര്യയ്ക്കുമെതിരെയും പൊലീസ് കേസെടുത്തിട്ടുണ്ട്. നാടകമേ ഉലകം എന്ന ചിത്രത്തിന്റെ ചിത്രീകരണത്തിനിടെ മുകേഷ് തന്നോട് ലൈംഗിക അതിക്രമം കാട്ടിയെന്നായിരുന്നു നടിയുടെ പരാതി. ഐപിസി 354 പ്രകാരമാണ് മുകേഷിനെതിരെ കേസെടുത്തിരിക്കുന്നത്. ജാമ്യമില്ലാ വകുപ്പ് പ്രകാരമാണ് ജയസൂര്യയ്ക്കെതിരെ കേസെടുത്തിരിക്കുന്നത്.
കൊച്ചിയിലെ നടിയുടെ പരാതിയിൽ ആകെ ഏഴ് കേസുകൾ രജിസ്റ്റർ ചെയ്യാനാണ് പൊലീസ് തീരുമാനം. ആറ് കേസുകൾ എറണാകുളത്തും ഒരു കേസ് തിരുവനന്തപുരത്തുമാകും രജിസ്റ്റർ ചെയ്യുക. മുകേഷ്, ജയസൂര്യ, മണിയൻപിള്ള രാജു, ഇടവേള ബാബു തുടങ്ങിയ നാല് സിനിമാ താരങ്ങൾ ഉൾപ്പെടെ ഏഴ് പേർക്കെതിരെയാണ് കേസ്. പ്രൊഡക്ഷൻ കൺട്രോളർമാരും ലോയേഴ്സ് കോൺഗ്രസ് സംസ്ഥാന പ്രസിഡന്റ് ചന്ദ്രശേഖരനെതിരെയും നടി പരാതി ഉന്നയിച്ചിട്ടുണ്ട്. ചന്ദ്രശേഖരനെതിരെയും പൊലീസ് കേസെടുത്തിട്ടുണ്ട്.
Story Highlights: Police file sexual assault case against actor Edavela Babu based on actress complaint in Kochi
