കഴക്കൂട്ടത്ത് നിന്ന് കാണാതായ 13 വയസ്സുകാരിക്കായുള്ള തിരച്ചിൽ തീവ്രമായി തുടരുകയാണ്. തിരുവനന്തപുരം കേന്ദ്രീകരിച്ച് പൊലീസ് വിവിധ സംഘങ്ങളായി തിരിഞ്ഞ് പരിശോധന നടത്തുന്നു. ബൈപ്പാസ് പ്രദേശത്താണ് പ്രധാനമായും പരിശോധന നടക്കുന്നത്. പൊതുപ്രവർത്തകരും തിരച്ചിൽ സംഘങ്ങൾക്കൊപ്പം ചേർന്ന് പൊലീസിനെ സഹായിക്കുന്നുണ്ട്.
പെൺകുട്ടിയെ കണ്ടെത്താനായി അസമിലേക്കുള്ള ട്രെയിനിൽ നടത്തിയ പരിശോധന ഫലം കണ്ടില്ല. നാല് പൊലീസ് ഉദ്യോഗസ്ഥർ ട്രെയിനിൽ തിരച്ചിൽ നടത്തിയെങ്കിലും കുട്ടിയെ കണ്ടെത്താനായില്ല. കോയമ്പത്തൂർ വരെയുള്ള പരിശോധനയിലും കുട്ടിയെ കാണാനായില്ല. ഇതോടെ തിരുവനന്തപുരം നഗരത്തിലേക്ക് തിരച്ചിൽ വ്യാപിപ്പിച്ചിരിക്കുകയാണ്. കഴക്കൂട്ടം മുതൽ തിരുവനന്തപുരം സെൻട്രൽ വരെയുള്ള എല്ലാ സിസിടിവി ദൃശ്യങ്ങളും പൊലീസ് പരിശോധിക്കുന്നുണ്ട്.
ഉച്ചയ്ക്ക് 12 മണി വരെയുള്ള സിസിടിവി ദൃശ്യങ്ങൾ പൊലീസ് ശേഖരിച്ചിട്ടുണ്ട്. 15 കിലോമീറ്റർ ചുറ്റളവിലാണ് പ്രധാനമായും പരിശോധന നടക്കുന്നത്. കുട്ടി നടന്നു പോകുന്നതിന്റെ വിവിധ സിസിടിവി ദൃശ്യങ്ങൾ പൊലീസിന് ലഭിച്ചിട്ടുണ്ട്. ചാക്ക ഭാഗത്തേക്ക് കുട്ടി സഞ്ചരിക്കുന്നതായാണ് ദൃശ്യങ്ങളിൽ നിന്ന് മനസിലാകുന്നത്. പെൺകുട്ടിയെക്കുറിച്ച് വിവരം ലഭിക്കുന്നവർ 9497960113 എന്ന നമ്പറിൽ ബന്ധപ്പെടണമെന്ന് പൊലീസ് അറിയിച്ചു.
Story Highlights: Search intensifies for missing 13-year-old girl in Thiruvananthapuram, police examining CCTV footage
