ഹിൻഡൻബർഗ് വെളിപ്പെടുത്തലിൽ പുറത്തുവന്ന രേഖകൾ കേന്ദ്രസർക്കാരിനെ കടുത്ത പ്രതിസന്ധിയിലാക്കിയിരിക്കുകയാണ്. അഗോറ എന്ന ഇന്ത്യൻ കൺസൾട്ടിംഗ് സ്ഥാപനത്തിൽ സെബി ചെയർപേഴ്സൺ മാധബി പുരി ബുച്ചിന് 99 ശതമാനം ഓഹരികളുണ്ടെന്നും, അവരുടെ ഭർത്താവ് ധബൽ ബുച്ചിൻ അഗോറയുടെ ഡയറക്ടറാണെന്നും രേഖകൾ വ്യക്തമാക്കുന്നു. 2022-ൽ കൺസൾട്ടിങ്ങിലൂടെ മാധബിക്ക് 2.19 കോടി രൂപ വരുമാനം ലഭിച്ചതായും വെളിപ്പെടുത്തലുകളിൽ പറയുന്നു.
2018 ഫെബ്രുവരി 26-ന് മാധബിക്ക് ഇ-മെയിൽ ആയി ലഭിച്ച അക്കൗണ്ട് സ്റ്റേറ്റ്മെന്റിൽ വിനോദ് അദാനിയുടെ കമ്പനിയുടെ അക്കൗണ്ടിന്റെ ഘടനാ വിവരങ്ങൾ ഉൾപ്പെട്ടിരുന്നതായി കണ്ടെത്തി. ഈ സാഹചര്യത്തിൽ, വിനോദ് അദാനിയുടെ കമ്പനിയിലെ നിക്ഷേപം സംബന്ധിച്ച് മാധബി ബുചിനോട് ധനമന്ത്രാലയം വിശദീകരണം തേടുമെന്നാണ് റിപ്പോർട്ട്. അതേസമയം, ഹിൻഡൻബർഗ് റിപ്പോർട്ടിന് പിന്നാലെ സെബി ഘടനയിൽ പുനസംഘടന ആലോചിക്കുന്നതായും, അധ്യക്ഷനും അംഗങ്ങൾക്കുമുള്ള അധികാരങ്ങൾ പുനർനിർണയിക്കുമെന്നും സൂചനയുണ്ട്.
ഈ വെളിപ്പെടുത്തലുകളുടെ പശ്ചാത്തലത്തിൽ, കേന്ദ്ര ഏജൻസികൾ വിവരശേഖരണം ആരംഭിച്ചതായി റിപ്പോർട്ടുകളുണ്ട്. ആദായനികുതി വകുപ്പ്, എൻഫോഴ്സ്മെന്റ് ഡയറക്ടറേറ്റ് തുടങ്ങിയ വിഭാഗങ്ങൾ അനൗദ്യോഗിക പരിശോധനകൾ തുടങ്ങിയതായി സൂചനയുണ്ട്. സെബി ചെയർപേഴ്സൺ മാധബി ബുച്ചിനെതിരായ ആരോപണങ്ങളുടെ നിജസ്ഥിതി അന്വേഷിക്കുന്നതിനൊപ്പം, മൈൻഡ് സ്പേസിന് സെബി നൽകിയ ഐപിഒ അംഗീകാരവും കേന്ദ്രസർക്കാർ വിലയിരുത്തുമെന്നാണ് വിവരം.
Story Highlights: Hindenburg report reveals documents implicating central government in crisis over SEBI chairperson’s investments
