ഇന്ത്യൻ ഗുസ്തി താരം വിനേഷ് ഫോഗട്ട് തന്റെ വിരമിക്കൽ പ്രഖ്യാപിച്ചു. സമൂഹ മാധ്യമത്തിൽ പങ്കുവെച്ച പോസ്റ്റിൽ, ‘സ്വപ്നങ്ങൾ തകർന്നു, ഇനി മത്സരിക്കാൻ കരുത്ത് ബാക്കിയില്ല, ഗുഡ്‌ബൈ റസ്ലിങ്’ എന്നാണ് അവർ കുറിച്ചത്. ഗുസ്തി ഫൈനലിലെ അയോഗ്യതക്കെതിരെ വിനേഷ് നൽകിയ അപ്പീലിൽ കായിക കോടതിയുടെ വിധി വരാനിരിക്കെയാണ് ഈ പ്രഖ്യാപനം വന്നത്.
50 കിലോ ഗ്രാം വനിതാ ഫ്രീസ്റ്റൈൽ ഗുസ്തി ഫൈനലിനു തൊട്ടുമുൻപ് വിനേഷ് ഫോഗട്ടിനെ മത്സരത്തിൽനിന്ന് അയോഗ്യയാക്കിയത് ഇന്ത്യക്ക് കടുത്ത ആഘാതമായിരുന്നു. വിനേഷിന്റെ ശരീരഭാരം 100 ഗ്രാം കൂടുതലാണെന്നു പറഞ്ഞാണ് അവരെ മത്സരത്തിൽനിന്നു വിലക്കിയത്. ഇന്ത്യയുടെ മെഡൽ പ്രതീക്ഷയായിരുന്ന വിനേഷിനെ അയോഗ്യയാക്കിയ നടപടി രാജ്യത്തിന് വലിയ നഷ്ടമായി.
ഒളിമ്പിക്സിൽ നിന്ന് വിനേഷ് ഫോഗട്ടിനെ അയോഗ്യയാക്കിയ സംഭവത്തിൽ പ്രത്യേകിച്ച് ഒന്നും ചെയ്യാനില്ലെന്ന് യുണൈറ്റഡ് വേൾഡ് റസ്ലിങ് തലവൻ നെനാദ് ലലോവിച് വ്യക്തമാക്കി. ഇത് സങ്കടപ്പെടുത്തുന്ന കാര്യമാണെങ്കിലും ഇക്കാര്യത്തിൽ സംഘടനയ്ക്ക് ഇടപെടാനാകില്ലെന്നാണ് അദ്ദേഹത്തിന്റെ നിലപാട്. ഈ സാഹചര്യത്തിലാണ് വിനേഷ് തന്റെ വിരമിക്കൽ പ്രഖ്യാപിച്ചിരിക്കുന്നത്.
Story Highlights: Indian wrestler Vinesh Phogat announces retirement following disqualification controversy at Paris Olympics
Image Credit: twentyfournews
