ആരോഗ്യമന്ത്രി വീണാ ജോർജ് വയനാട്ടിലേക്ക് തിരിച്ചു. മഞ്ചേരിയിൽ വച്ച് രണ്ട് ബൈക്കുകളും മന്ത്രിയുടെ വാഹനവും കൂട്ടിയിടിച്ച് അപകടമുണ്ടായി. മന്ത്രിയുടെ കണ്ണിനും കഴുത്തിനും പരിക്കേറ്റിരുന്നു. പ്രാഥമിക ചികിത്സയ്ക്ക് ശേഷമാണ് മന്ത്രി വയനാട്ടിലേക്ക് യാത്ര തിരിച്ചത്.
അപകടത്തിൽ ബൈക്കിലുണ്ടായിരുന്നവർക്ക് സാരമായി പരുക്കേറ്റു. ഒരു സ്ത്രീയുടെ തലയ്ക്ക് പരുക്കേറ്റതായി റിപ്പോർട്ടുണ്ട്. പരുക്കേറ്റവരെ മഞ്ചേരി മെഡിക്കൽ കോളജിൽ എത്തിച്ചു. ഇന്ന് രാവിലെ 7.30 ഓടെയാണ് അപകടമുണ്ടായത്. വയനാട്ടിൽ നിന്ന് രക്ഷപ്പെടുത്തി കൊണ്ടുവന്ന രണ്ടുപേരെ ആശുപത്രിയിൽ കണ്ട ശേഷമാണ് മന്ത്രി ദുരന്ത ഭൂമിയിലേക്ക് തിരിച്ചത്.
വയനാട് മുണ്ടക്കൈ ചൂരൽമല ദുരന്തത്തിൽ 166 പേർ മരിച്ചതായി റിപ്പോർട്ടുണ്ട്. 191 പേർ വിവിധ ആശുപത്രികളിൽ ചികിത്സയിൽ കഴിയുകയാണ്. 50 മൃതദേഹങ്ങൾ തിരിച്ചറിഞ്ഞതായും അറിയുന്നു. പരുക്കേറ്റ പലരുടേയും നില അതീവ ഗുരുതരമാണ്. ദുരന്തഭൂമിയായി മാറിയ വയനാട്ടിലേക്കാണ് മന്ത്രി വീണാ ജോർജ് യാത്ര തിരിച്ചിരിക്കുന്നത്.
Story Highlights: Health Minister Veena George involved in accident en route to disaster-hit Wayanad
Image Credit: twentyfournews
