ജനാധിപത്യ പാർട്ടിയിൽ വിമർശനങ്ങൾ ഉണ്ടാകുമെന്നും അധികാരത്തിൽ കൈ കടത്തിയാൽ നിയന്ത്രിക്കാൻ തനിക്കറിയാമെന്നും കെപിസിസി പ്രസിഡന്റ് കെ സുധാകരൻ പ്രസ്താവിച്ചു. പ്രതിപക്ഷ നേതാവ് വി ഡി സതീശനെതിരായി കെപിസിസിയിൽ ഉയർന്ന ആരോപണങ്ങളിൽ മറുപടി പറയുകയായിരുന്നു സുധാകരൻ. താനും വി ഡി സതീശനുമായി നിലവിൽ ഒരു പ്രശ്നങ്ങളും ഇല്ലെന്നും അദ്ദേഹം കൂട്ടിച്ചേർത്തു.
കെപിസിസി ഭാരവാഹികളുടെ അടിയന്തര ഓൺലൈൻ യോഗത്തിൽ വിഡി സതീശനെതിരെ രൂക്ഷവിമർശനം ഉയർന്നിരുന്നു. അപക്വമായ പ്രവർത്തനമാണ് വി ഡി സതീശന്റേതെന്നും ജില്ലാ ചുമതലയുള്ള നേതാക്കളെ അറിയിക്കാതെ തീരുമാനങ്ങളെടുക്കുന്നുവെന്നും നേതാക്കൾ വിമർശിച്ചു. വയനാട്ടിലെ ചിന്തൻ ശിബിറിൻ്റെ ശോഭ കെടുത്തിയത് വിഡി സതീശനാണെന്നും ആഭ്യന്തര കാര്യങ്ങൾ വാർത്തയാകുന്നതിന് പിന്നിൽ പ്രതിപക്ഷ നേതാവാണ് കാരണമെന്നും യോഗത്തിൽ വിമർശനം ഉണ്ടായി.
ഈ വിമർശനങ്ങൾക്കെതിരെയായിരുന്നു കെ സുധാകരന്റെ പ്രതികരണം. വി ഡി സതീശനെതിരെ ഉയർന്ന വിമർശനങ്ങൾ പരിശോധിക്കുമെന്ന് കെ സുധാകരൻ പറഞ്ഞു. ജനാധിപത്യ പാർട്ടിയിൽ വിമർശനങ്ങൾ സ്വാഭാവികമാണെന്നും എന്നാൽ അധികാരത്തിൽ കൈ കടത്തുന്നത് നിയന്ത്രിക്കാൻ തനിക്കറിയാമെന്നും സുധാകരൻ വ്യക്തമാക്കി.
