സിനിമാ മേഖലയിലെ വനിതകളുടെ പ്രശ്നങ്ങൾ പഠിച്ച ജസ്റ്റിസ് ഹേമ കമ്മിറ്റി റിപ്പോർട്ട് സർക്കാർ ഇന്ന് പുറത്തുവിടും. 295 പേജുകളുള്ള റിപ്പോർട്ടിൽ നിന്ന് 62 പേജുകൾ ഒഴിവാക്കി 233 പേജുകൾ മാത്രമാണ് പുറത്തുവിടുക. വിവരാവകാശ കമ്മീഷന്റെ ഉത്തരവിന്റെ അടിസ്ഥാനത്തിൽ സ്വകാര്യത ഹനിക്കുന്ന ഭാഗങ്ങൾ ഒഴിവാക്കാമെന്ന തീരുമാനമാണ് എടുത്തിരിക്കുന്നത്.
സാംസ്കാരിക വകുപ്പ് സെക്രട്ടറി രാജൻ ഖോബ്രഗഡേയുടെ നേതൃത്വത്തിലുള്ള കമ്മിറ്റിയാണ് ഈ തീരുമാനമെടുത്തത്. നിയമവകുപ്പും ഒഴിവാക്കുന്ന പേജുകൾ പരിശോധിച്ചശേഷമാണ് അന്തിമ തീരുമാനത്തിലെത്തിയത്. ഒഴിവാക്കിയ ഭാഗങ്ങളിൽ കൂടുതലും നടിമാരും സാങ്കേതിക പ്രവർത്തകരും നൽകിയ മൊഴികളാണ്. ഇവർ കമ്മീഷന് മുന്നിൽ മൊഴി നൽകിയത് പുറത്തുപോകരുതെന്ന നിബന്ധനയോടെയായിരുന്നു.
റിപ്പോർട്ട് കൈമാറുമ്പോൾ ജസ്റ്റിസ് ഹേമ സർക്കാരിനോട് ഈ കാര്യം ശ്രദ്ധിക്കണമെന്ന് നിർദേശിച്ചിരുന്നു. പരാതികളിലും മൊഴികളിലും വസ്തുപരമായ പരിശോധന നടത്തിയിട്ടില്ലെന്നും അന്വേഷണത്തിലൂടെ മാത്രമേ ഇക്കാര്യത്തിലെ നിജസ്ഥിതി ബോധ്യപ്പെടുകയുള്ളൂവെന്നും റിപ്പോർട്ടിൽ ചൂണ്ടിക്കാട്ടിയിട്ടുണ്ട്. മലയാള സിനിമാ ലോകത്തെ സ്ത്രീകൾ നേരിടുന്ന പ്രശ്നങ്ങൾ സംബന്ധിച്ച് പഠിച്ച ഈ റിപ്പോർട്ട് സിനിമാ മേഖലയിലെ വനിതകളുടെ അവസ്ഥയിലേക്ക് വെളിച്ചം വീശുമെന്ന് പ്രതീക്ഷിക്കപ്പെടുന്നു.
