ജമ്മു കശ്മീരിലെ പൂഞ്ചില്‍ ഭീകരരുമായുണ്ടായ ഏറ്റുമുട്ടലില്‍ സൈനികന് വീരമൃത്യു സംഭവിച്ചു. ഉത്തര്‍പ്രദേശിലെ ഹാത്രസ് സ്വദേശിയായ ലാന്‍സ് നായിക് സുഭാഷ് കുമാറാണ് ജീവന്‍ ത്യജിച്ചത്. പൂഞ്ചിലെ കൃഷ്ണ ഘാടി പ്രദേശത്തുണ്ടായ ഏറ്റുമുട്ടലില്‍ ഗുരുതരമായി പരുക്കേറ്റ സുഭാഷ് കുമാര്‍ ചികിത്സയിലിരിക്കെയാണ് മരണത്തിന് കീഴടങ്ങിയത്.
ചൊവ്വാഴ്ച പുലര്‍ച്ചെയാണ് പൂഞ്ചിലെ അതിര്‍ത്തി പ്രദേശത്ത് ഭീകരാക്രമണം നടന്നതെന്ന് സൈന്യം സ്ഥിരീകരിച്ചു. 24 മണിക്കൂറിനുള്ളില്‍ കശ്മീരില്‍ നടക്കുന്ന രണ്ടാമത്തെ ആക്രമണമാണിത്. തിങ്കളാഴ്ച സുരക്ഷാ ഉദ്യോഗസ്ഥനായ പര്‍ഷോതം കുമാറിന്റെ വീടിന് നേരെയും ഭീകരര്‍ ആക്രമണം നടത്തിയിരുന്നു.
വ്യാഴാഴ്ച ദോഡ ജില്ലയില്‍ ഭീകരരുമായുണ്ടായ ഏറ്റുമുട്ടലില്‍ രണ്ട് സൈനികര്‍ക്ക് ഗുരുതരമായി പരുക്കേറ്റിരുന്നു. ഇതിന് പിന്നാലെയാണ് വീണ്ടും തുടര്‍ച്ചയായ ആക്രമണങ്ങള്‍ മേഖലയില്‍ റിപ്പോര്‍ട്ട് ചെയ്യുന്നത്. ഈ സംഭവങ്ങള്‍ പ്രദേശത്തെ സുരക്ഷാ സ്ഥിതിയെക്കുറിച്ച് ആശങ്ക ഉയര്‍ത്തുന്നു.
