ഓഹരി വിപണിയിൽ റെക്കോർഡ് നേട്ടം രേഖപ്പെടുത്തി. സെൻസെക്സ് ചരിത്രത്തിലാദ്യമായി 81,000 പോയിന്റ് കടന്ന് 81,203 പോയിന്റിലെത്തി. 700 പോയിന്റ് ഉയർന്നാണ് സെൻസെക്സ് ഈ പുതിയ ഉയരം കുറിച്ചത്. നിഫ്റ്റി 50 സൂചികയും 24,700 പോയിന്റ് മറികടന്ന് 24,746 പോയിന്റിലെത്തി. രണ്ട് സൂചികകളും 0.5 ശതമാനം വീതം ഉയർന്നു.
ഐടി ഓഹരികളാണ് ഇന്ന് ഏറ്റവും കൂടുതൽ നേട്ടമുണ്ടാക്കിയത്. ജൂൺ പാദത്തിൽ ടിസിഎസും എച്ച്സിഎൽ ടെക്കും മികച്ച വളർച്ച കാഴ്ചവച്ചു. നിഫ്റ്റി 50 സൂചികയിലെ ഉയർന്ന നിരക്കിലെത്തിയ എട്ട് കമ്പനികളിൽ നാലെണ്ണം ഐടി മേഖലയിൽ നിന്നുള്ളവയാണ്. ടെക് മഹീന്ദ്ര, ബ്രിട്ടാനിയ ഇൻഡസ്ട്രീസ്, എച്ച്‌യുഎൽ, ഒഎൻജിസി, വിപ്രോ, ഇൻഫോസിസ്, ടിസിഎസ് എന്നിവയുടെ ഓഹരികൾ നേട്ടം കൈവരിച്ചു.
സെൻസെക്സിൽ ടാറ്റ കൺസൾട്ടൻസി സർവീസസ്, ഹിന്ദുസ്ഥാൻ യൂണിലിവർ, ബജാജ് ഫിൻസർവ്, ടെക് മഹീന്ദ്ര, സ്റ്റേറ്റ് ബാങ്ക് ഓഫ് ഇന്ത്യ എന്നിവയുടെ ഓഹരികൾ നേട്ടമുണ്ടാക്കി. എന്നാൽ അദാനി പോർട്ട്സ്, ഏഷ്യൻ പെയിന്റ്സ്, ടാറ്റ സ്റ്റീൽ, എൻടിപിസി, പവർ ഗ്രിഡ്, അൾട്രാടെക് സിമന്റ് എന്നിവയുടെ ഓഹരികൾ നഷ്ടം നേരിട്ടു.
